Malaysia: Tang lam in tlun aa timmi Kawlrammi 16 tlaih an tong

Tang lam in tlun aa timmi Kawlrammi 16 tlaih an tong

Malaysia Ramri Hngak Ralkap nih tang lam in Myanmar ram tlun aa timmi Kawlrammi 16 cu Malaysia-Thailand ramri, Kampung Kubang Tiga pawngah an tlaih hna.

“October 2, 2019 zinglei sml 7 ah an tlaih hna. Thailand ram ah tang lam in luh an timh lio ah an tlaih hna hi a si.”

“Phungninglo minung an um timi thawngpang kan theih i kan kal hnawh hna. Kawlrammi 16 kan tlaih hna,” tiah Perlis state Ramri Hngak Ralkap bawi Rodzi Abu Hassan nih a chim.

“Anmah chungin Malay holh tlawmpal thiam mi an um. Malaysia ram ah kum 2 hrawng an um cang i Selangor state le Perlis state, Kedah khua ah ngantlaih rianttuanmi an si.”

“An ram tlunnak ding caah minung pakhat ah RM1,400 cio an pek. An umnak hmun in ramri tiang a kuatu mi dang an um hrimhrim lai. Atu hi thil sining kan hlat lio pi a si,” tiah Hassan nih tuni ah a chim.

Tlaihmi Kawlrammi 16 cu Padang Besar District Police Headquarters ah an kirpi hna i Lahwahkah Upadi 1959/63 Dal 6(3) in taza an cuai hna lai.

September 8, 2019 zong ahkhan tang lam in Myanmar ram tlum aa timmi kum 2 in kum 45 kar Kawlrammi 8 cu ramri ah tlaih an tong. _ BH Online

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a ṭial cang, atanglei ah rel khawh an si.