Chin state, Matupi peng khuate 6 sianginn ah cachimtu (saya/ma) an um lonak le an i zat lonak thla 1 leng si cang, tiah Matupi pengin Pyithu Hlutdaw MP U Pathang nih a chim.
MP Pu Pathang nih, “rank a kaimi le aa ṭhialmi an um ruangah sianginn cachimtu an i zat lonak si. Cachimtu an um lomi kong cu Peng Fimcawnnak Zung bawi nih kan hnu thla ah thawng aa ka thanh i keimah zong nih kan hnu thla ah Rampumpi Hlutdaw ah ka chim cang,” tiah a chim.
“Atu cu thla 1 luan cang hita. Cachimtu rianrang in kan ngah khawhnak dingah Tanghra awng le degree ngah cazin zong Peng Fimcawnnak Zung bawi cu cazin ka lakter i ka kuat cang hna.
“Atu lawlawse cu cachimtu an tam deuhnak sianginn in cachimtu tlawmpal kan ṭhial chung hna,” ati.
Cachimtu an i zat lonak khuate 6 sianginn hna cu;
- အမက ထည်ရှိကျေးရွာ၊
- အမကလောင်ထန်းတလန်၊
- အမက ဒိုင်ဒင်း၊
- အမက(ခွဲ) ဆုန်ဆီး၊
- အမက(ခွဲ) အေးတန်၊
- အမက(ခွဲ)မာလာ le
- မှုလွန်ငါပန် အမက(ခွဲ) sianginn hna an si.
Hmulunngapan sianginn zongah siangngakchia 50 an um i sayaci pakhat le general worker (fial chukcho rianṭuan) pakhat lawng an um.
Matupi peng khuate 6 sianginn ah cachimtu ding cu ani ca le a thla ca in lawlawse an lak chung hna, tiah Matupi khua Ngala sanguk bawi Sa Long nih a chim.
Pu Sa Long nih, “Matupi peng ah middle school cachimtu 121 kan herh tiah Fimcawnnak Zung bawi kaa in ka theih,” tiah a chim.
Chin state cu kum fatin Myanmar ram chung state/region 14 lakah Tanghra awng an tlawm biknak asi peng. Chin state chung ahcun [lam a chiatnak, tlunkal a harnak] Paletwa le Matupi peng ahhin Tanghra awng an tlawm bik khun.
Charhchan: Chin World
