Tangka hlen ruangah kum 1 thongthlak tongmi mintami May Than Nu cu tuni July 1 ah thonginn in a chuak cang.
“May Than Nuh cu tuni ah Insein thonginn in a chuak cang,” tiah a va director Sin Yaw Mg Mg le May Than Nu he neihniam simi pakhat nih an chim.
Cun, Sin Yaw Mg Mg nih a Facebook page zong ah an chungkhar hmanthlak a tar i a cungte ah May Than Nu thonginn in a chuak cang tiin a ttial chih.
Mintami May Than Nu cu Daw San San Myint nih inn cawknak ah tangka Kyats ting 400 a ka hlen tiin Yankin peng biaceih zung ah 2016 ahkhan taza a cuai.
Tazacuaitu San San Myint le May Than Nu hi a luancia kum 30 chung ah aa daw i aa neihniam ngaimi an si.
Mah kong ahhin kap 2 nih tehte caah an i chuah pimi minung 13 cu biaceih zung nih bia a hal hna.
Biaceih zung nih May Than Nu cu a sual ko a ti caah tu kum January 2 ah kum 1 thongthlak dingin bia a chahpiak.
