Mindat khuapi ah an sak liomi NLD zung tangin ti a put caah, ‘inn nan sak liomi vialte ngol chung rih uh’ tiah Sipin nih August 9 ah cathanh a chuah.
Cathanh a chuahmi chungah, “2019 August 6 ah Mindat peng NLD zung saknak nawl pek asi ko nain, zung an saknak tang in ti a put caah atu an sak liomi vialte ngol chung rih hna seh, saknak nawl an ngah tthan tik lawngah sak rian thok tthan te hna seh,” tiin a ttial.
NLD zung an saknak hmun cu Sanpiah sang, Vum Thu Maung lam ah asi i atu hi foundation an lim i kongkaret tung an bunh cang. An saknak hmun pawng i thingkung zong an hau len cang hna.
Mahka hmun hi tiput a chuahnak si lo, tiah Mindat peng NLD chairman le Chin state Hlutdaw lutlai changtu U Teik Thang nih a chim.
U Teik Thang nih, “tiput a chuahnak hmun si an timi cu an chim sawhmi si. Hlan ahcun a rak chuak ko. Atu cu chuak ti lo. Tthal lebang ahcun a car in a car. Zei hmanh um lo. Foundation kan tuahmi online ah an tar ruangah buainak phunkip a chuak,” tiah a chim.
“Party zung kan saknak pawng zongah zunput le vok kawm an um ko. Atu soiseltu zong cu zuamcawhtu party nih a hruaimi pawl an si. Mah zung sak kong nih hin 2020 Thimnak ah zeihmanh a kan dawn lai lo. Mipi zohkhenhnak caah sakmi a si ko hen cu,” tiah a chimchap.
Hmunhma cu NLD zung saknak caah Mindat peng NLD party chairman U Teik Thang min in Penguk Zung (GAD) ah 2019 January 18 ah pungsan 105/106 an sok. An sang mipi nih January 25 ah Peng Zohkhenhnak Committee (TMC) ah dohnak ca an ap colh.
Peng Sipin Zung zong nih mahka hmun cu tiput a chuahnak si, tiah 2017 ah a rak fehter.
Tiput a chuahnak pawng i NLD zung sak a dotu lakah aa tel vemi Chin state Sipin Vuanci hlun U Nung Naing (ဦးႏိုန္ႏိုင္း) nih, “mah kong hi NLD party EC tampi nih an hngal lo. Kan doh buin hramhram in an sak chihmi hi cu Hlutdaw lutlai changtu asi nakin a kan namneh bak si,” tiah a chim.
“Kahin minung umnak inn an sak ahcun tiput a chuakmi a thur lai. Mah ti hi keimah sawng minung 150 le inn 10 nih an dinmi si,” tiah a chimchap. — Zalen
