Mizoram palik bawi pakhat nih, “Mizoram ah a hung zaammi Myanmar rammi 10,025 an si cang,” tiah Zarhpini (nizaan) ah a chim.
“Kan hnu zarh chung lawngah minung 700 hrawng an hung zaam. Mipi (cozah rianṭuan si lomi) deuh lawngte an si. Naupawi, ngakchia le kum 90 hrawng simi tar zong an i tel.
“10,025 chungah 22 cu MP an si hna.
“June 14 ah Mizoram ah a hung zaammi Chin state cozah lutlai Salai Lian Luai zong atu hi Mizoram ah aa dor rih ko.
“Mizoram in an ram Myanmar ah a kir cangmi zong an tam pah ve,” ati.
June 15 in June 26 kar ah Myanmar rammi 195 Champhai pengah an lut. Mizoram ah peng 11 a um i peng 10 ah Myanmar ralzaam an lut cang. Champhai peng lawngah Myanmar ralzaam 4,352 an um, tiah Mizoram palik cazin ah hmuh khawh asi.
Aizawl innthluan ah Myanmar ralzaam 1,621 an um, ti zong palik cazin ah hmuh khawh asi.
Min langhter a duh lomi Mizoram cozah rianṭuan pakhat nih, “Myanmar rammi pawl cu Chin state in a rami an tambik. February thla ah ralkap nih CDM tuahmi tlaihkhihnak a tuah thokin atutiang hi Chin state in mi tlawm tete in dong loin an hung zaam peng,” tiah a chim.
“Nai hrawng a hung zaammi pawl cu nu, naupawi, ngakchia le tar deuh lawngte an si caah Mizoram cozah zong nih kan kham kho hna lo.
Champhai pengah ralzaam buk 2 an sak lio
“Myanmar ramri in meng 12 hrawng a hlatnak Champhai peng Zawlsei khuate ah ralzaam buk 2 kan sak piak hna lio asi,” tiah Tuipuiral group of Young Mizo Association (YMA) president MC Lalrammenga nih a chim ve.
“Myanmar ralzaam pawl caah tiin YMA zaanghleicawi pawl nih kan sakpiak hna.
“Farkawn le Vaphai khuate zongah khuami nih tu zarh chungah ralzaam buk 1 an sak lai,” ati.
Tuipuiral group of YMA nih ṭuanvo an lakmi Champhai peng Tuipui Nichuahlei ahhin khuate 21 an um.
“Atu hi khuate 20 ah Myanmar ralzaam 1,419 an um cang,” tiah Lalramenga nih a chim.
“Tam deuh cu an chungkhat sinah an um, cheukhat cu anmah tein inn an i hlan i kuli rianṭuan chom in anmah tein an i zohkhenh.
“Mah pinah, Myanmar ralzaam tampi cu COVID-19 ruangah Mizoraam cozah nih luh a sianh hna lo caah Mizoram leikam ramri Tio tiva kam ah an riak hna.
“An khua in an i phorhmi facang an ei, cun NGO le a ti khomi pumpak zong nih rawl an bawmh ve hna,” tiah a chimchap.
