Myanmar model Thin Thin cu Organizer (puai tuahtu) hlen ruangah Mrs (nutung) muidawh zuamnak ah aa zuam bal.
“Miss ti ahcun Miss lawng ka theih. Nutung pawl nih Miss zuam an ngah ka thei lo. Mah lio ahhin puai tuahtu nih form a ka phih piak i kaa zuam venak a si” tiah model Thin Thin nih a chim.
Minta Wai Luh Kyaw taza a cuaimi kong ah biaceih zung ah muidawh aa zuamnak kong he pehtlai in biahal tete a um caah atu bantuk in a chim hi a si.
“Miss kong he pehtlai in bia an ka hal. Mah kongah zeidah chim ka duh ti ahcun keimah ka theihmi cu Miss lawng a si. Mrs ti ka thei bal lo.
“Nungak simi lawng Miss zuamnak ahhin i tel khawh a si tiah ka theih. Puai tuahtu (Organizer) nih a tuah taktakmi cu nutung muidawh zuamnak a si. Mirang ca ka thiam ve lo tikah Mrs zuamnak sile Miss zuamnak a si ka hngal lo” tiah Thin Thin nih a chim.
Mrs muidawh zuamnak puai a tuah tu nih hin Thin Thin cu tangka a hlen i a tu ahcun a tlau cang ti a si.
“Atu ahcun mah minung cu a um hmanh um ti lo. A ka hlen i a zaam diam ko. Mihrokhrol a si. License ngeimi a si ahcun nihin tiang a um rih ding a si. License cu chim hlah! Keimah hmanh degree ngei lo ka si. Nain, adeu tuah i mileng khan ah degree ka la tiin tar khawh a si ko. Tangka tampi a ka hlen” tiah Thin Thin nih a chimfawn.
Thin Thin cu zuamnak a luh hnu ah kir tthan awk tthalo dirhmun a si ruangah Mrs zuamnak ah aa zuam behnak a si.
“Zuamnak ah ka luh lio ah keimah cu Miss ka si. Keimah lawng siloin nungak aa zuammi an tampi. Nungak 3,4 an i tel. Tangka zong kan liam cang pinah puai zong an thok cang caah kir tthan awk ttha ti lo.
“Cu ruangah Mrs zuamnak ahcun kaa zuamnak a si. Mah ruang zong ahcun Miss International Crown zong kaa zuamnak a si” tiah Thin Thin nih a chim.
Atu hi online ah Thin Thin i a hlan lio tuanbia pawl le konglam hna cu phozar an si nain Thin Thin nih cun a dik lomi a si a ti. – The Irrawaddy Burmese
