Tuni July 8 zaantim ah Yangon ramtthen, Mingalardon peng ah motor 2 an i pah i minung 6 an thi.
A dirmi motor cu a hnulei in motor pakhat nih a pah caah a hmun ah minung 5 an thi. A dang pakhat cu sizung ah a thi.
“Thil a can hi zaantim sml 12.45am hrawng ah a si. Rang takin monghmi Kluger phun motor nih lam kam ah a dirmi motor cu a hnulei in a pah.
“Motor hi Dengo datsi rawnnak station pawngah a dir i datsi station pawng um dawr ah thil cawk ah an dirmi a si.
“Datsi station um CCTV kan zoh tikah a pah ning faktuk. A pahtu motor cu a hmailei zong sop dih. Cun, minung 5 cu a hmun ah an thi colh. Pakhat cu sizung ah an kalpi nain hnu ah a thi ve,” tiah meithat rianttuan pakhat nih a chim.
A thimi pa 6 cu hawikawm an si hna. A hramthok ahcun 7 ding an si Yangon tlun an i tim nain an hawipa pakhat nih a tulh tak hna.
Palek nih thil sining an hlat lio a si.
