Rohingya 21 cu rianhrang ṭuanter dingin kum 2 thong an thlak hna, adang kum 18 tang 8 cu Mino Cawnpiaknak Sianginn ah kum 2 ca in an kuat hna.
Nu 15 le pa 6 cu Pathein thonginn ah an kuat hna, kum 18 tang nu 5 le pa 3 cu Yangon region Kawhmu peng um Nghat Aww San Mino Cawnpiaknak Sianginn ah kum 2 ca in an kuat hna.
September 26 ahkhan an dihlak (bawhte 1 aa tel) in Pajero mawṭaw an i cit lio ah Pathein le Nga Yoke Kaung kar lam cungah palek nih an tlaih hna.
Mawṭaw mongtu cu palek nih mawṭaw an dirter cangka in a zaam.
Palek nih “Rohingya pawl hi hmatpungtin an ngei lo” tiah an chim.
Anmah pawl Yangon ah kalpi dingin a hngaktu bus hmete mongtu 2 cu palek nih an tlaih hna i palek nih bia an hal hna lio asi.
Nga Yoke Kaung cu Pathein nitlakthlanglei le Rakhine state thlanglei in 100km hla ah a ummi rili asi.
Khuami nih ‘Rohingya tampi cu puaisa nih lawng in Nga Yoke Kaung ah an ratpi hna i mawṭaw in Pathein in Yangon lei an kalpi tawn hna’ tiah an chim.
An tlaih hna lio a hmutu pakhat nih, “Rohingya pawl cu tilawng in a rung phanmi an si ṭheo lai, aruang cu Rohingya pawl caah Rakhine state chuah a fawi biknak lam cu rili in si.
“Anmah a hngaktu bus hmete pakhat cu lam cungah a dir. Puaisa nih rili kam in Pajero mawṭaw in bus hmete tiang kalpi an timh hna i lampi ah an tlaih hna,” tiah a chim.
Palek nih, “puaisa pawl nih Rohingya pawl cu Ayeyarwaddy region i Maw Tin Suun le Thabaung lei zongin an kalpi tawn hna,” tiah an chim.
“Rakhine state Ann le Gwa peng in Pathein-Monywa highway ah a kalmi Rohingya tampi zong kan tlaih lengmang hna,” an ti.
