Hpakant lunghrinh cawhnak hmun a minh ruangah minung 174 an thih hnu in Myanmar ralkap nih “nan rian nan fel lo” tiin ralbawi 2 a phuah hna.
Leimin in a thimi pawl cu Myanmar ram chung hmun zakip in a rami sifak deuh lawngte an si. Lunghring cotu company nih an kaltakmi pelpawi a kawlmi an si hna.
Lunghring cotu company pawl hi Myanmar ralkap he aa pehtlaimi an si.
Phuahmi ralbawi 2 cu; Kachin Security le Ramri Vuanci Colonel Nay Lin Tun le min langter lomi ralbawi pakhat an si.
“Vawlei a minhnak hmun hi kal onh lomi asi. Hohmanh kalter hna lo dingin ven cu phuahmi ralbawi 2 rian asi,” tiah ralkap biachimtu ralbawi Zaw Min Tun nih a chim.
“An rian an fel lo. Ralkap nih hlathlainak kan tuah lai i phuahmi ralbawi 2 cu aa tlak ningin dan kan tat hna lai,” ati.
Leimin ah ruak 174 an hmuh cang, hmuh rih lomi tampi an taang rih. Leimin nih a phum dih hna i mi chanhtu pawl nih leivor huah in an kawl cuahmah hna lio asi.
Hpakant lungman sung cawhnak in kum fatin tangka $31 billion peng an hmuh. Nain, ralkap bawi le mirum tumtlang pawl nih an i lak dih i cozah sinah a phanmi cu a tlawmte. A dihlak in cozah sinah phan sehlaw ram thlennak caah tampi san a tlai hnga.
A thimi chungkhar pawl cu cozah nih tangka tlawmpal cio a bulh hna. Nain, cozah cu zaangfahnak thinlung zeihmanh a ngei lo tiin mi tampi nih an mawhchiat.
Kum 50 chung hrawng lung mansung i cuh in KIA le cozah ralkap an i kap peng. Ral ruangah Kachin state mipi a ting leng harnak an tong cang.
Yangon um thil sining hlathlaitu Richard Horsey nih, “lunghring cawhnak hi a ningpi in mirum pawl sual tuahnak asi. An rianṭuan tu pawl an hrem tuk hna,” ati. — AFP
