Kalay peng biaceihzung nih kum tlinglo ngakchia 2 tlaihhrem ruangah kum 43 thongdan a pek cangmi Evan Lal Biak Lar cu Sagaing ramtthen biaceihzung nih thongdan a ttumhpiak ruangah Kalaymyo hrambunh zatlang bu pawl nih August 26 ah an lungtlin lonak an langhter.
2019 January 16 ah Kalaymyo a hnulei Letpanchaung khua ah a ummi Evan Lal Biak Lar@Lar Boih cu kum 14 le kum 15 nu pahnih a tlaihhram hna ruangah Kalay peng biaceihzung nih kum 43 thongdan a pek.
Evan Lal Biak Lar a sihni nih Sagaing ramtthen biaceihzung ah nawlnak a tuahpiak i 2020 May 3 ah kum 43 thongdan in kum 17 ah an ttumhpiak.
Women For Justice in biachimtu Daw Thanda Aye nih, “Aho an si ah tangka ngeih ruangah a si kho lomi pi kha theih ko buin an tuahmi kha kan duh lo. Kalay peng biaceih zung nih kum 43 thongdan a pekmi hi kan lungtling” tiah a chim.
Tlaihhrem tongmi kum 15 nute a pa nih, “Fak piin dantat hna seh ti ka duh. Kum 43 thongthla ko hna seh ti ka duh.
“Evan Lal Biak Lar a thil tuahmi cu kan lungfak tuk. Hibantuk thil hi a tuah lai ti kan ruat bal lo. Ka fanu thawngpang ka theih cu ihkhun cungah ka hngal i ka tuar tuk. Ka lung zong nuam lo tuk” tiah a chim.
Tlaihhrem tongmi ngakchia 2 cu Falam khua in sanginn kai dingin Lar Boih te inn ah an rung ummi an si.
Evan Lal Biak Lar nih kum 2015, June thla ah kum 15 le kum 2018 April thla ah kum 14 cu a tlaihhrem hna tiin ngakchia hna an nulepa nih Tahan palek sakhan ah 2018 April 13 ah an report. Tuni duhlo langhternak cu Ngandamnak Vuanci Zung nih thawng a thanhmi he aa tlak ning in minung 30 nak tam loin Taungzalet sang, Bogyoke lam um Naykyar inn hmai ah Kalaymyo hrambunh zatlang bu pawl a simi Women For Justice, Dingdi le Upper Chindwin Youth Network hruainak in an tuah.
