US President Donald Trump nih “North Korea hruaitu Kim Jongun ka ton ṭhan lai” tiin tu zarh thokka ah a chim i South Korea ah US Ramdang Vuanci changtu Pu Stephen Biegun a thlah nain, North Korea nih “Trump he ton kan zuam lo” ati diam.
Kim Jongun a farnu Pi Kim Yo Jong nih, “tu kum chung ahcun US le North Korea tonnak a um lai lo,” tiah North Korea cozah media KCNA in a chim.
“US nih nuclear hriamnak hlaw dih seh ti a kan duh, mah lo cun chawleh a kan phihmi onpiak a kan tim lo. US nih kan cungah a lungput a thlen lo ahcun kan i ton zongah kan caah zeihmanh santlaihnak a um lo, kan tong zuam lo, ” ati.
“Nuclear hriamnam kan hlaw lai lo kan ti lo, nain atu cun kan hlaw kho rih lo. US nih a kan ti ning paoh in kan lehrulh lai.”
“US nih a kan tongh lo le harnak a kan pek lo paoh ahcun US tlerh kan i tim lo. Zei paoh punghman tein a kal peng ko lai” ati.
President Trump cu Nihnihni ah Gray TV nih interview a tuah i “North Korea nih ton a kan duh ka hngalh ko, kan ton ko hna lai,” tiah a chim.
Mah hnu ah atu bantukin North Korea hruaitu Kim Jongun a farnu nih a chim hi si.
Nai hrawng cu Kim Jongun muisam a lang huaha lo, North Korea ah a biapi bik si vemi a thi cangmi a pu birthday puai zongah a chuak lo. A farnu peng a hung lang. Kim Jongun hi thi dengin a zaw i si men lai, tiah mi tampi nih an ruahdamh.
Trump le Kim Jongun cu 2018 June ah Singapore ram ah tonbiaruahnak an ngei i “nuclear hriamnam hlawt dih cikcek dingin rianṭuan thok ding” in lungtlinnak min an thut.
2019 February ah Vietnam ram Hanoi khuapi ah an i tong ṭhan. North Korea nih “kan khualipi Pyongyang pawngum Yongbyon nuclear sehzung hi kan hrawh lai i 2016 hnu in chawleh na kan phihpiakmi vialte kan onpiak” ati.
Trump nih “nan hrawh ding a tlawm tuk, nan nuclear sehzung vialte hrawk dih uh” ati hna i North Korea nih a duh ve lo caah zeihmanh lungtlinnak ser kho loin lohma an baan.
2019 June thla ah South Korea le North Korea ramri ah chikhat te an i tong ṭhan. 2019 chung ṭhiam ah Sweden khualipi Stockholm ah kap hnih cozah palai pawl tonbiaruahnak an ngei ṭhan nain zeihmanh aphi chuak loin an ṭul ṭhan. — VOA, Bloomberg
