Computer thiamsang misual pawl nih nizaan ah vawlei cung mirum bik Pu Jeff Bezos le Bill Gates telh in mirum le minthang tampi Twitter account an hack piak hna.
An hackmi pawl lakah;
- President hlun Pu Barack Obama
- Vice President hlun le atu president aa cuh liomi Pu Joe Biden
- Atu lio vawlei cung mirum bik Pu Jeff Bezos
- Leicung mirum bik 2nk Pu Bill Gates
- Nuaithongngei (billionaire) Pu Elon Musk
- Vawlei cung company vialte lakah a rumbik si vemi Apple
- Rapper minthang Pu Kanye West
- Reality TV minthang Kim Kardashian
- Media in nuaithongngei aa chuahmi Pu Mike Bloomberg
- Online taxi company Uber le adang tampi an i tel hna.
An hackmi account pawl ahcun “Mipi sinah bawmhnak ka pek lai. Atang i Bitcoin address ah tangka nan kuatmi paoh cu let hnih in kan kuat ṭhan dih hna lai! $1,000 nan kuat cun $2,000 kan kuat hna lai …” tiin an ṭial hna.
Bitcoin cu online tangka asi. Stock exchange bantukin bank ATM card in cawk i a man kai tikah a miat in zuar le tangka in chuah khawh asi. Bitcoin ah kuatmi tangka cu bank ah kuatmi bantukin cozah nih a kuatu le kuatmi minung a hngalh khawh lo caah thlithup thil tuah a duhmi pawl nih an hman khun. Atu lio hi Bitcoin 1 ah $9,000 leng asi.
An thil chihmi Bitcoin address ahcun mipi nih $100,000 leng an kuat manh.
Twitter company nih a hngalh colh caah hack mi accounts pawl ah mi hlennak ca an tarmi cu minutes tlawmpal ah a delete dih colh. Accounts pawl zong cu hackers nih lak khawh lo dingin password thlen khawh lo dingin le lawlawse ca post khawh lo dingin a hren dih colh.
An hack ning cu Twitter company nih, “a chungril a thleng khotu kan company rianṭuan pawl kha hacker nih an hack hmasa hna hnu ah anmah account in Twitter chungril ah an lut i hitin mirum le minthang accounts ah ca an tar hi si,” tiah a thanh.
“Hacker hi minung pakhat lawng asi lo. Minung tampi i bawm in timhciam maam le caan saupi lakin kan company rianṭuan pawl an hackmi hna si,” ati.
Atu cu Twitter company nih a kham khawh cang. An hack ning le thil sining tling tein kan hlat cuahmah lio asi, kan hmuhmi paoh kan thanhte lai, tiah Twitter nih ati. — Bloomberg, CNN, BBC English
