Paletwa peng, Maung Hnamah khuate ah a ummi Chin miphun pawl nih atu voi 1 ral a thawh rih ahcun kan dihlak in kan khua kan chuah tak lai i hmun dang ah kan i tthial cang lai an ti.
Maung Hnamah khuate ahhin inn 100 hrawng a um i Khumi Chin pawl an si hna.
Kaladan tiva cung ah AA le cozah ralkap an i kahdohmi ruangah thinphang lungrethei in an um hna.
“Zeitik ahdah ral a thawh lai tilawng te ruat in thinphang bu in kan um peng ko. Atu voi 1 ral a thawh rih ahcun tlik/zaam dingin bia ka khiah cang. Kan dihlak in hmun dang ah i tthial lawlaw lai kan ti,” tiah khuami pakhat nih a chim.
Khuami pawl cu lo zong an kal ngam lo i pawcawmnak caah rianttuan awk an ngeih lo caah atu hi dinei kongah harsatnak an tong.
An khua ah khual an rat/phanh paoh ah mibawmtu an ra rua tiin ngakchia, upa tang loin an i bu dih hna.
AA le cozah ralkap i kahdohnak ruangah khuami cheukhat cu hmun dang ah aa tthialmi zong an um cang.
Hika khuami hna ca ahcun ral thawh ti lo hi abiapi bikmi a si.
Cun, Paletwa khua kam ah a ummi cunglei Mee Latwa khuate i khuami pawl cu zaan ah an khua ah an ih ngam lo i Paletwa khua ah an riak tawn.
An khua ahhin AA le cozah ralkap an i kahdohnak ah miakpi/bomb nih voi 2 tiang a tlak bal hna.
“Hiti ning in cun hmun dang ah tthial a hau ko. Hmun dang ah tthial kan duh tuk ko nain tthialnak hmun a um lo.
“Tthialnak a um lo caah cheukhat cu kan thih zongah kan inn te ah thi ko ning a timi zong an um,” tiah cunglei Mee Latwa khua in khuami pakhat nih a chim. – The Irrawaddy Burmese
