Lal Nuna | Khonumthung — Chin state Paletwa peng Maung khuate khuami 3 cu September 14 ahkhan Rakhine state Mrauk U khuapi ah rawl an caw. An kir lei lam tanṭim ah an tlau, tiah U Lun Thang nih a chim.
“Mrauk U peng Singauh khuate in 1pm hrawngah an chuak. Lawng in an chuak i Ngu khuate pawngah an tlau tiin kan theih. Rawl cawk aa thawhmi an si. September 18 zongah an chungkhat an kawl hna nain an hmu hna lo,” tiah a chim.
A tlau khuami 3 hna cu;
- U Hla Khaing, kum 23
- U Maung Maung Phe, kum 32 le
- U Maung Poo Se, kum 40 hna an si.
An 3 ningin nupi he chungkhar a dirh cangmi lothlo an si.
An khua le pawngkam khuami paoh cu Rakhine state i Mrauk U le Minbya peng ah facang, chiti, cite le adang rawl an caw peng i set-hle in an phorh tawn.
A tlaumi 3 cu chungkhar nih an kawl hna nain an nehnang zong an hmuh lo caah Tantaung khua palek sakhan ah thawng an thanh.
Khumi zatlang bu KACC nih August 30 ah cathanh a chuah i “Paletwa pengah atu bantukin khuami 10 an tlau cang…” ati.
Khuami an tlaunak aruang cu fiang tein an hngal lo nain Rakhine Ralkap (AA) an si lai, tiah KACC le khuami nih an zumh.
Rakhine Ralkap (AA) biachimtu U Khaing Thu Kha nih cun, “khuami an tlaumi kongah kanmah cu zeihmanh kan i sai lo, Kawl Ralkap nih AA bantuk i umter in an tuahmi si kho,” tiah a chim
