AA le Kawl Ralkap ral ruangah an kharmi Paletwa peng sianginn pawl cu kan on ṭhan cang hna nain cachimtu 300 leng kan herh rih, tiah Peng Fimcawnnak Bawi U Myo Min nih a chim.
U Myo Min nih, “rampi cozah nih zaanghleicawi cachimtu 360 a kan pek caah sianginn dihlak a ong kho dirhmun kan phan cang,” tiah a chim.
“Kharmi sianginn a um ti lo. Atu harnak kan tonmi cu cachimtu kan i za lo. Cachimtu 300 leng kan herh rih hna.
“Sianginn cheukhat ahcun sianginn pakhat ah minung pakhat lawng nih ca a chimh hna. Khuate cheukhat ahcun hlan chom in ca an chimh hna, a sinpitnak paoh in an tuah,” ati.
“Paletwa peng ah rampi cozah nih a kan pekmi cachimtu pawl cu Tangkua awng, Tanghra awng le degree ngah pawl an si hna i ca a chim bal rih lomi an si ruangah, cachimtu kan i zat lo pinah cachimtu um hnihkhat zong an chanbau ngai.
“Cachimtu pawl hi ca a chim bal rih lomi an si hna caah cachimh an chanbau ngai. October sianginn khar zong ah ni 5 tinṭan kan auh hna.
“Ṭhal sianginn khar zongah mah bantuk cun thla 1 chung cachimh tinṭan tuah kan hau,” tiah a chim.
Paletwa pengah primary, middle le high school cachimtu kan pe uh tiin Chin state zong an hal i state cozah nih rampi cozah sin zongah a chimh, tiah kan theih.
Charhchan: Chin World
