Malaysia: Nizaan ahkhan Malaysia ram ah phungninglo in Kawlrammi a phurtu Malaysia rammi Mohd Zafarul Nizam Hamzah cu palek nih thilak in meithal in an kah.
September 24, zaan sml 7.30 hrawngah Mohd Zafarul Nizam Hamzah nih Kawlrammi 8 cu PERODUA Alza motor in a phurh hna.
Phungninglo minung phurtu motor cu Kelantan state in palek nih an dawi i Puchong, Tesco sang i Jalan Pusat Bandar 9 ah motor mong pa cu meithal in an kah.
“Lunghrinhmi motor cu Pusat Bandar 9 ah palek nih an dirter. Motor mong pa cu dir duh loin palek mawttaw a pah caah meithal in an kah hi a si,” tiah Selangor palek bawi Datuk Noor Azam Jamaludin nih a chim.
“Palek nih motor cu meithal in voi 2 an kah i motor mong pa cu a thutnak hmun ah a thi colh. A pawng ah a thumi Myanmar pa cu a ban le a tang ah an hlimh.”
“Motor license an check tik ah Gombak khua ah a ummi nu pakhat min in registered tuahmi a si. Palek nih kherhlainak an tuah lio,” tiah Malaysia palek bawizik Tan Sri Abdul Hamid Bador nih a chim.
A thimi Mohd Zafarul Nizam Hamzah cu a hlan zongah phungninglo minung a phur lengmang. Cun, upadi voi 11 a buar bal cang mi a si tiah palek nih an chim.
Kawlrammi nu 2 le pa 6 cu palek nih an tlaih hna.
An hliamhmi Myanmar pa cu Serdang Sizung ah aa thlop lio a si. Cun, meithal kah a cannak hmun ah a cawl cang vemi Kawlrammi pakhat zong palek nih an tlaih chih.
