Malaysia Prime Minister Mahathir Mohamad nih tuni ahkhan hlawhtlinnak hmuhnak ding ah rianttuan i zuam a biapitnak le a ummi rian paoh ttuan a herhnak kong cu Malay miphun a cawnpiak hna.
“Malay miphun hi bawi an si a ti mi hna an um. Zei bawi? Misifak, thilti khawhnak zeihmanh ngei lomi, midang zaangfahnak aa bochanmi pawl cu maw bawi cu an si?” tiah PM Mahathir nih ‘Rianttuan Lo’ timi tlangtar in a chim.
“Malay miphun nih an sining hi an i theih a cu cang. Nain, an i thei rih lo. Rianttuan an zuam lo. Malay miphun cu a ummi rian paoh kha ramdangmi an ttuanter peng ko hna lai.”
“Cu ruangah, kan ram chung ah ramdangmi an khat dih. Kan ram chung ah ramdangmi 7 million an um. Rian an ttuan dih hna caah Malay miphun pawl hi zeidah an ton te lai?.”
“Kan hmailei kong hi kanmah kut chung ah a um. Mi cung i thinhun lennak nih thiltha a chuahter lai lo. Milu cu kan karh thluahmah nain, sifak tampi hi mirum tlawmte tluk hmanh an si lo,” tiah Mahathir nih a chimchap.
“Ramdangmi nih a thurhnawmmi rian le ttihnung rian an ttuan dih caah Malay miphun cu nuam tein a umter hna. Ramdangmi nih rian an ttuan i tangka tam pipi an hmuh zongah Malay miphun cu an zeihmanh poi lo.”
“Malay ram hi kanmah ta a si ti ruahnak an ngei. Nain, kei ka hmuhnak ahcun an ruahnak cu a palh ka ti. Rianttuan an zuam lo. Rian biatak tein an i zuam lo ruangah an sifak peng. Malay rammi miphun dang (Tuluk, India, tbk.,) cu rian an i zuam i, a rummi nih an rum chin lengmang. Mah lak ahcun, a sifakmi Malay miphun cu an sifak chin lengmang,” tiah MP Mahathir nih a chim. – CNA
