Russia President Vladimir Putin cu US President Joe Biden nih, “Ukraine ram na tuk ahcun US le kan ṭanṭi ram pawl nih fak taktak in kan in lehrulh lai,” tiin ralrin a pek.
US cozah nih, “Russia nih zeitik paoh ah Ukraine a tuk khawh men caah Ukraine um US minung vialte a rannak in Ukraine chuah tak dih uh,” tiin kan hnu zarh ah thawng a thanh cang.
President Biden nih, “Russia ralkap pawl hi Ukraine an luh le tuk bak ahcun US le kan ṭanṭi ram pawl nih fak chiahru in kan in lehrulh lai ati,” tiah US President Zung White House nih a thanh.
Russia President Putin nih a ralkap ting 1 (100,000) leng bak Ukraine ramri ah tank le hriamnam ngan pawl he a thlah hna caah Ukraine, US le Europe ram hruaitu vialte zaan hngilh kho lo lungrethei in an um hna.
Kum 2014 ahkhan Russia President Putin nih Ukraine ram, Crimea state a tuk lak cang caah atu bantukin Ukraine ramri dihlak ah a ralkap khat dihlak in a kuat hna cu NATO le US an lungrethei taktak.
White House nih, “US nih cun Russia le Ukraine entainak hi cabuai cung ramkhel biaruahnak in daihter kan i zuam ko, nain a herh ahcun a herh ning paoh in hma lak dingin timhcia kan si,” tiah US ralkap in tuk ding phun tiang in a chim.
US cozah nih helicopter, vanlawng le missile kahnak hriamnam tampi zong Ukraine ralkap a kuat hna i Russia ramri ah Ukraine ralkap nih redi in an i kalpi dih cang. US ralkap 3,000 leng zong Ukraine innpa Poland ah an kuat cang hna.
Ukraine khualipi Kyiv um US Tanzung rianṭuan le an chungkhar pawl tam deuh cu US cozah nih a lak dih cang hna. Ukraine ralkap tinṭan a petu US ralkap (Florida National Guard) 160 zong Pentagon nih a lak cang hna.
