President Trump cu Real Clear Politics nih Nihnihni ah interview a tuah. “Tu kum ah Pu Kanye West nih President cuh aa timhmi cu 2024 President aa cuhnak dingah lam sialtu ṭha tuk asi lai,” tiah Trump nih a chim.
Pu Kanye West nih “2024 ah President kaa cuh lai” tiin 2019 ah a rak chim bal.
Trump nih, “Pu West nih a chimmi pawl hi an biapi ngai tak. Cuh a timhmi zong cu ruah awk a um ngai.”
“States cheukhat lawngah aa cuh kho lai. Aruang cu states tampi ahcun president i cuh dingin min peknak caan an khar cang.”
“Pu West nih president cuh aa timhning le a khuakhan ning cu ralring tein ka cuanh peng ve ko,” tiah a chim.
Pu West nih Zarhteni ah “2020 ah President kaa cuh lai” tiin Twitter ah a thanh. Minung ting 5 leng nih an share i 1 million leng nih an like. Pu West cu a minthan pinah a rum tuk caah aa cuh tak ahcun mi lung a lak ngai lai.
Nihnihni ah Forbes nih interview a tuah i “ngah ding bakin kaa cuh lai …” ati.
Pu West president aa cuh taktak ahcun Trump ca nakin Biden caah apoi deuh lai. Biden a vote tu ding mino tampi kha rap hlasa minthang Pu West nih a lak dih hna lai, tiah zumh asi.
Trump a vote ding pawl hi cu Mirang le tar deuh si hna kaw Pu West nih a la kho theng hna lai lo. Cucaah, Trump caah cun Pu West aa cuh ding hi thawngpang ṭha ngai asi, Biden tei a fawi deuh lai.
Pu West cu states cheukhat lawngah aa cuh khawh lai caah president a ngah lo ding fiang. Nain, Trump bia bang 2024 ah president aa cuhte ding si ahcun mipi nih an theih chinnak si lai i thil ṭha ngai asi ṭhiam ko.
President Zung (White House) biachimtu Pu Hogan Gidley nih, “Pu West nih president kaa cuh lai tiin thawng a thanhmi cu Democratic party caah sunghzatlaknak ngan taktak asi,” tiah a chim.
“Democratic party nih nau thah an duhmi le African American pawl harnak pek dingin policy an sermi pawl a phozar hna bak si,” ati. — Fox News le Reuters
