US rapper minthang Kanye West nih ‘atu thok cun Pathian hla lawng ka sa cang lai, Pathian hla a si lomi paoh cu ka sa ti lai lo’ tiah thawng a thanh, tiin Fox Business nih a ṭial.
Kanye West cu Zarhteni ahkhan Chicago khuapi ah a album thar “Jesus is King: A Kanye West Experience” timi ngaihnak puai a tuah.
Mah lio cun mipi sinah atu bantukin a chim hi si.
“Kanye nih Pathian hla a si lomi paoh cu kaa chuah ti lai lo, atu thok cun Pathian hla lawng ka sa cang lai tiin thawng a thanh,” tiah music media company Fake Shore Drive ngeitu Andrew Barber nih Fox Business ah a chim.
“Midang nuamhternak hlasak cu a za cang, ati,” tiah Barber nih a chim.
Kanye West cu tutan a album thar tuah ahhin sau taktak a rau.
Chicago ah a hla ngaihnak puai a kalmi paoh cu tawhhrenhmi bawm chungah an phone an chiahter hna caah Kanye West nih thawng a thanh lio cu hohmanh nih video an thlak kho lo.
A nupi Kim Kardashian West nih, “kan pa a album thar hi Khrihfa si a bawmtu taktak asi,” tiah “The View” thawngzamhca sinah a rak chim.
“Amah nun i damternak caah Kanye nih mah album thar hi a tuahmi si, amah pumpak kong, hawikom le chungkhar kong deuh lawngte si. A hung piangthar, Khrih nih a khamh,” tiah a chim.
