US ram, Kansas tiva ah a paammi Rebecca Van Sui Par, kum 11 ruak cu nizaan ah an hmuh cang.
A ruak cu Nikhatni zaanlei 6pm ah Kaw Tiva kam ah an char.
Tiva ah tilawng aa citmi pakhat nih ruak cu a hmuh caah 911 a chawnh i Meithat Zung nih tilawng 2 in an va kawl hnu ah tiva kam ah an char hi si.
Rebecca le a chungkhar cu Zarhteni zaanlei ahkhan Kansas tiva kam ah lente an i celh lio ah an i lenhmi bawlung ti chungah a tla, Rebecca nih char dingin a kal hnawh i tihrah nih a fenh hi si.
Ti nih a fenh cangka in Meithat Zung nih zaan tiang an kawl nain an hmu lo. A thaizing Zarhpini ah tilawng 3 in chun ni tlak an kawl ṭhan nain an hmu lo. Ni 2 hnu, nizaan ceo ah atu bantukin an hmuh hi si.
Kansas City um Lutuv Khrihfabu member Pu Bawi Tin le Pi Sui Ci an fanu asi. Hlasak le laam a thiam ngaimi si caah an khrihfabu nih an i zohthla ngaimi zong asi.
“Ruah lo tukin a kan liamtak caah USA um Lautu mi vialte kan ngaihchia tuk hringhran. Tantakmi chungkhar Bawipa nih hnem hraam ko hna seh,” tiah Salai Biak nih a ngaihchiatnak a ṭial.
