Myanmar rammi 4 cu palek nawlpeknak tel loin leng ah a bu in an um caah atu hi tlaih dingin kan kawl hna lio a si tiah Singapore palek nih an chim.
Tagore Industrial Park ah an i bu hna.
Myanmar pa 4 cu park ah Myanmar ram ah a ummi ramkhel party pakhat thapeknak an tuah. Party min cu palek nih an chim lo.
August 27 ah mi nih an report hna i palek nih hlathlainak an tuah.
“Singapore ram ahhin an ram ramkhel cawlcanghnak tuah hna hlah seh tihi ramdangmi vialte nih thei hna seih ti kan duh” tiah Singapore palek nih a ti.
Ramdangmi nih Singapore upadi hi an zulh hrimhrim a hau tiah Singapore palek nih a ti fawn.
Singapore ram ahcun palek nawl peknak tel loin mipi lakah ramkhel cawlcanghnak tuah hi upadi nih a onh lo.
Cun, Singapore palek nih ramdang ramkhel kongah ramdangmi cawlcanghnak nawl a pe hna lo.
Cozah nawl peknak tel loin ramkhel cawlcanghnak a tuahmi silole aa telmi paoh cu upadi ningin dantat an si lai tiah Singapore palek nih a ti. – CNA
