Tuni ah South Korea ah Covid-19 mizaw thar 300 leng an hmuh tthan hna. Ni 16 chung bak a pehpeh in a za leng an hmuh cang hna caah mizaw ihkhun an i za lai lo tiin an thinphang.
Korea Ngandamnak Zung nih Covid-19 mizaw thar 308 kan hmuh hna tiah thawng a thanh. A thimi (321), a dam cangmi le a zaw liomi fonh in South Korea ram ah Covid-19 zawtnak ngei hmuhmi dihlak 19,400 an si cang.
Hmasa ahcun South Korea ram ah Covid-19 an control khawh cang nain naite ahkhan Khrihfa biakinn in zawtnak a karh tthan caah mipi nih Seoul ah sandah an piah.
Covid-19 mizaw an karh tuk ruangah nizaan tiang ahkhan Seoul khua um sizung pawl ah mizaw zual ihkhun 4.5% lawng a lawng cang. Kan hnu zarh ahcun 22% ihkhun a lawng.
Covid-19 mizaw (mizaw zual silomi) ca ihkhun zong 24% lawng a lawng cang.
“Atu hi Seoul khua um sizung pawl ah Covid-19 in a zaw tukmi le sizung riah haumi caah ihkhun 15 hrawng lawng a um cang.
“Nain, sizung in a chuak ding an tam caah a rauhhlan ah ihkhun tam deuh a lawng ko lai” tiah Ngandamnak Vuanci Zung rianttuan Yoon Tae-ho nih a chim.
Church, office, nursing home le clinic/sizung pawl in Covid-19 a karh tuk caah cozah nih Ningani ahkhan rawldawr ah rawlei a khap. Covid-19 aa thok ka in South Korea nih rawldawr ah rawlei a khap cu tulawng hi a si.
Seoul khuapi um biakinn, nighclub, gym le sianginn tampi cu an khar cang hna , cun lengchuah tikah mask i hruk hrimhrim ding tiin cozah nih nawl a chuah. – CNA
