Covid-19 mizaw 4 an umnak Chin state, Tedim khua cu zawtnak a karhnak hnga lo lockdown tuah dingin kan timh cuahmah lio asi, tiah state cozah biachimtu Sipin Vuanci U Soe Htet nih a chim.
Sipin Vuanci nih, “Tedim, Tonzang, Kaptel le Tuithang khua ahcun a hleice deuh in ralrin a herh caah hiti ningin rengh an si rih ko lai.
“Lockdown tuah ahcun adang umkalnak caah a har tuk ding si, nain Tedim khua hi cu duh/lo zongah lockdown tuah dingin kan timh cuahmah lio asi.
“Dinti, mei, tbk., a herhmi dangdang pawl an i zatnak hnga kan timh cuahmah lio asi. Umkal cu a ningpi in kan phit lai ti ka ruat lo. Lockdown tuah a hau ko tiin meeting ah bia kan khiah cang,” ati.
Atu lio hi Tedim khua ah Covid-19 zawtnak ngeimi 4 an um. Midang zong zawtnak an ngeih/lo an check hna lio asi, a ngeimi an um rih ahcun lockdown tuah dingin bia an khiah hi si, tiah kan theih.
U Soe Htet nih, “atu Tedim khua ah zohkhenh liomi pawl an pum tihaang cu Yangon laboratory ah an kuat, result a chuah tikah Covid-19 zawtnak ngei an um rih ahcun lockdown tuah a hau cang,” tiah a chim.
“Dinti zong an i zat lo caah lawlawse cu ti tanker le meithat mawtaw in kan phawt hna lio asi. Ti laknak hmun 4 a um ko nain ramtang lawngte an si caah thla 3 hrawng caan lak a hau. Cun, electric mei in ti khon khawh asi lai.
“Tedim khua ningin mei kan pe kho lo nain, miset hmang in sizung cu suimilaam 24 chung kan pek peng,” ati.
Tedim khua lockdown an tuah ahcun kan khua ah palek an tlawm caah cozah nih tam deuh in a chap hau lai, cun nitin nunnak caah a herhmi rawl zong i khon kan hau lai, sizung ah miset 2 an chiah nain caan sau rinh awk a ṭha lo kho men, tiah khua mino zaanghleicawi Mun No nih a chim.
Vawlei pumpi a culmi Covid-19 zawtnak nih Myanmar ram a den ve thokin tu zingka tiangah zawtnak ngei 111 kan hmuh cang hna. Mah chungah 5 an thi i 7 an dam cang, tiah Ngandamnak le Zaanglek Vuanci Zung nih thawng a thanh.
Charhchan: Chin World
