Covid-19 zawtnak ngeimi kum 6 ngakchia pate cu Tedim sizung i thlop dingin a phan cang.
Ngakchia pate cu (Case 318) cu India ram in a rung kirmi si i Chin state, Tonzang peng, Haicin khua ah a ummi a si.
Tuchun sml 12 ahkhan Tonzang in Zomi Youth Association ambulance in Tedim sizung ah an rat pi.
Ngakchia pate cu Tedim sizung uk Dr. Zaw Myint Naing, specialist Dr. Aung Maw le nurse pawl nih an don.
Covid-19 mizaw ngakchia pa cu a nu he khan khat te ah an chiah hna lai i, an thlop lai tiah kan theih.
Cun, Tedim khua ah ni 21 chung quarantine mi minung 4 cu tuni ah an ttinter cang hna.
Minung 4 (pa 3 le nu 1) cu Tuluk ram in a rak tlungmi an si i quarantine an tuah hna ni a tlin cang pinah zawtnak hmelchunhnak an ngeih lo caah ca an pek hna i an thlah hna.
Hmasa ah Chin state ah Covid-19 mizaw 10 an hmuh hna i an dam dih cang. A donghnak bik mizaw cu July 7 ah a dam i sizung in ṭinter asi.
Chin state ah Covid-19 mizaw an um ti lo kan ti ni 2 hnu ah atu bantukin India in a rung kirmi kum 6 ngakchia pate pum chungah zawtnak rungrul an hmuh hi si.
