Zarhpini ahkhan Thailand ram, Muang district ah a ummi dawr pakhat ah Kawlrammi an i vel hna i minung 1 a thi. Zahan zaan ah Kawlrammi pa 6 palek nih an tlaih hna.
Samrong Nua palek bawi Arthit Simcharoen nih,”Zarhpini zaanlei sang ah Maung Tho Phe (kum 19) cu Imperial World Samrong dawr luhnak zawn ah nam in sawh a tong. A hma fahtuk caah a nunnak liam,” tiah a chim.
Maung Tho Phe a veltu hi Kawlrammi pa 6 an si i an velh dih hnu ah an zaam tak.
Palek nih thilsining an hlat i Samrong Nua palek nih mi velhnak ah aa tel vemi Kawlrammi pa 1 cu Zarhpini zaan ah Bangkok khuapi i Soi Phahon Yothin 48 ah an tlaih.
Bia an hal i a dang Kawlrammi pa 5 zong Nikhatni ah an tlaih khawh hna.
Kum 20 in kum 29 kar a simi Kawlrammi pa 6 cu Samrong Nua palek sakhan ah biahal dingin an kalpi hna.
Kawlrammi pa 6 nih “Zarhpini zaanlei ah dawr ah kan kal i Kawlrammi group 1 he kan i tong. Bia kan i al hna i kan i vel hna. Kan hawipa Win Thun Aung (kum 20) nih nam aa chuah i Maung Tho Phe a sawh. Maung Tho Phe vawlei ah a tluk kan hmuh sin tein kan zaam hna,” tiah palek sin ah an chim.
Kawlrammi pa 6 cu palek nih mipi lak hriamnam put le mithah case in taza an cuai hna.
