Thailand ram, Ratchaburi province, Ban Pong district ah caw a phormi motor pakhat cu tlanglawng nih a pah i caw le Myanmar pa an thi.
Thil a can hi July 13 ah si i Nong Kop Temple hmai ah tlanglawng nih motor a pahnak kong cu Ban Pong palek sakhan ah thawng an thanh i a hmun ah palek an ra.
Palek nih accident a cannak pawngkam cu an zohfel tikah Ratchaburi province in license aa tuahmi Nissan motor a sop dihmi an hmuh.
Motor cu Bangkok khuapi in Kan Tang khua ah a kalmi Express Train No 168 nih a pahmi a si.
Lam kam ah Myanmar pa Min Min, kum 35 ruak an hmuh. Min Min he motor aa cit ttimi Myanmar pa Sho cu a luat manh i aa hliam caah Ban Pong sizung ah an kuat.
Min Min le Sho cu tlanglawng nih a pah hna ahhin motor leng lei ah an i hlonh dih. Cun, an phorhmi caw 1 zong a thi.
Sho a chimnak ah Min Min he hin Nakhon Pathom province ah sathahnak ah rianttuan tti an si. Caw pakhat cu lo ah an lak i Nakhon Pathom ah kalpi dingin lam an tan lio ah tlanglawng nih a pah hna hi a si.
Motor pah tu tlanglawng zong tlawmpal a rawh caah an remh i atu cu an hman khawh cang. – Bangkok Post
