Chin state, Hakha sizung ah aa thlopmi kum 23, Covid-19 mizaw pa (Case 232) cu a pum ah voi 2 tiang zawtnak rungrul an hmu ti lo.
A dam cang caah tu chun 12.30pm ahkhan sizung in a chuak cang tiah kan theih.
Myanmar ram ah Covid-19 mizaw hmuh hmasabiknak Chin state ah Covid-19 mizaw pakhat hmanh an um ti lo.
Tuni sizung chuakmi hi a donghnak bik Covid-19 in a dammi a si.
Covid-19 mizaw (Case 232) konghe pehtlaih in Hakha sizung uk Dr Mang Biak Kung nih,”a pum ah zawtnak rungrul kan hmu ti lo. A ngan zong dam. Sizung in a ttin hnu zongah inn ah ni 7 chung lengchuak loin a um rih lai,” tiah a chim.
Tuni sizung in a chuakmi mizaw (Case 232) cu Malaysia ram in a tlungmi a si. Mindat khua ah quarantine a si lio ah Covid-19 zawtnak rungrul a ngeih an theih i Hakha sizung ah an thlop.
Chin state chungah Covid-19 zawtnak ngei hmuhmi dihlak 10 an si. Atu ahcun an dihlak in an dam cang hna i sizung in an chuak dih cang hna.
Atu tiang ahcun Chin state chungah Covid-19 mizaw an um ti lo. Hmailei kong cu chim khawh silo nain Pathian nih kan veng ko seh.
