YANGON – Thailand a tlawng Britain rammi 2 nan thah hna tiin Thailand Biaceihzung Sangbik nih thihdan a pekmi Win Zaw Htun le Zaw Lin cu tu thla ah Myanmar nih Thailand Siangpahrang a nawlpiak hna lai.
Myanmar Ramdang Vuanci Zung nih, “nawlnak cahren cu Thailand Sihni Phu nih October 14 ah Myanmar sihni phu sinah an ap lai,” tiah a chim.
“Myanmar sihni phu nih an zohfel hnu ah October 21 ah Thailand Siangpahrang sinah ap asi te lai,” tiah Ramdang Vuanci Zung nih a chim.
“Thah dingin bia nan khiahmi hi adang deuh in khiahpiak hna uh, tiin nawl asi lai,” tiah Kawlrammi 2 sihni phu chungtel U Aung Myo Thant nih a chim.
“Thailand Supreme Court nih bia a khiah cangmi cu a ningin thlen khawh asi ti lo, tlawmte remh lawng a ngah,” tiah a chim.
Kum 2014 ah Thailand a tlawngmi British 2 cu nan tlaihhrem hna i nan thah hna, tiin Kawlrammi 2 cu Koh Samui Biaceihzung nih 2015 December ah thihdan a pek hna.
An sihni nih a donghnak bik an nawlpiak hna nain August thla ah Supreme Court nih thihdan a pek ṭhiam hna.
Kawlrammi 2 cu Thailand ah aa hlawhfa mi an si. Siangpahrang ngaihthiamnak lawng ruahchannak a um cang.
Thailand palek nih lih le hrokhrawl in sual an phawt hna i DNA tehte zong lih in an tuah pinah ‘kan thah ko ti hna seh’ tiin minung fa celh lo ding tiang an hrem hna, tiah thawng a rak thang.
Ramdang rianṭuan covo dirkamhtu And hall nih August thla ah an sual lo timi tehte zong a rak ap piak hna. — The Irrawaddy
