Tuni October 3, 2020 ah Malaysia ram ah Covid-19 zawtnak ngeimi 317 an hmuhchap hna i zawtnak ngei hmuhmi dihlak 12,088 an si cang.
Suimilam 24 chungah Covid-19 in a dam i sizung in ttin termi 121 an si. Zawtnak aa thokka in nihin tiang a dammi 10,216 an si cang.
Ngandamnak Vuanci Zung director-general Tan Sri Dr Noor Hisham Abdullah nih, “Covid-19 mizaw a bubu in hmuhnak hmun (cluster) 3 a um. Kedah state ah 2 le Selangor state ah 1 an si,” tiah a chim.
Tuni zawtnak ngei hmuhmi pawl hi ramchung ah zawtnak aa chawnmi lawngte an si.
Atu lio sizung pawl ah Covid-19 in a zaw liomi 1,735 an si. Mizaw zual zohkhenhnak (ICU) ah mizaw 29 an um. Mizaw 4 cu an zual deuh caah cuap thli luhchuah ternak seh (ventilator) bunh an si.
Covid-19 in a thimi 1 a um. Kum 57 pa a si i thikai le zunthlum zawtnak ngeimi a si. Sabah state ah a si. Atu tiang ah a thimi 137 an si cang.
Runvennak Vuanci Ismail Sabri Yaakob nih, “Mizaw thar hmuhmi tam deuh cu phungninglo ramdangmi thonginn (camp) le lam hla pi ah ummi pengkulh pawl ah an si caah lockdown a herhnak um lo” tiah tuni ah a chim.
