September 21 ah Malaysia ah Covid-19 mizaw 57 an hmuhchap hna i cu chungah 49 cu Sabah state lawngte ah an si, tiah Ngandamnak Vuanci Zung nih a ti.
Ngandamnak Vuanci Zung director-general Tan Sri Dr Noor Hisham Abdullah nih, “Covid-19 mizaw thar 57 lak ah 51 cu ramchung ah zawtnak aa chawnmi an si” tiah tuni ah a chim.
A tangmi 6 lakah 3 cu Indonesia ram in Malaysia ah phungninglo in a rak lutmi an si. Cun, a dang 3 cu Pakistan, Zambia le UK in a rung tlungmi an si hna.
Suimilam 24 chungah Covid-19 in a dam i sizung in ttin termi 40 an si. Malaysia ram ah Covid-19 zawtnak a umka in nihin tiang a dammi 9, 395 an si cang.
Atu lio sizung pawl ah Covid-19 in a zaw lio mi mizaw 751 an um.
Malaysia ram ah January thla in khan Covid-19 zawtnak hmasabik hmuh a si i a tu tiangah Covid-19 zawtnak ngei hmuhmi dihlak 10,276 an si cang.
Atu hi mizaw zual zohkhenhnak khan (ICU) ah mizaw 9 an um i, 2 cu hawi hlei in an zual caah ventilator bunhpiak an si.
Tuni ah Covid-19 in a thimi an um lo. A thimi 130 an si.
