Tuni September 29 ah Malaysia ram ah Covid-19 zawtnak ngeimi 101 an hmuhchap hna. Zawtnak ngei a zaleng an hmuh hi a pehpeh in nithum a si cang.
Ngandamnak Vuanci Zung director-general Tan Sri Dr Noor Hisham Abdullah nih, “Mizaw 73 cu Sabah state in an si. A tangi hi Selangor in mizaw 14, Johor, Kedah, Perak, Melaka le Federal Territory of Kuala Lumpur hna in an si” tiah tuni ah a chim.
Tuni mizaw thar 101 hmuhmi lakah 4 lawnglawng hi ramdang in a rung tlungmi an si. A tangmi paoh cu ramchung ah zawtnak aa chawnmi an si.
Dr Noor Hisham nih hmun 4 ah mizaw tampi (cluster) kan hmuh hna. Sabah ah hmun 2, Selangor le Johor ah hmun khat veve kan hmuh hna.
Tuni ah Covid-19 in a dam i sizung in ttin termi 50 an si. Zawtnak aa thokka in nihin tiang a dammi 9,939 an si cang.
Atu lio ram pumpi ah Covid-19 in a zaw liomi mizaw 1,062 an si.
Tukum January in khan Malaysia ram ah Covid-19 zawtnak aa thok si i atu tiang ah zawtnak ngei hmuhmi dihlak 11,135 an si cang.
Atu lio ah mizaw zual zohkhenhnak khan (ICU) ah mizaw 13 an um i 5 cu ventilator bunhpiak an si.
Suimilam 24 chungah Covid-19 in a thimi an um lo. A thimi cazin 134 ning a si. – The Star
