Kuala Lumpur — Malaysia cu ‘Kum 1951 Ralzaam kong Ram Khat le Khat Lungtlinnak (UN lungtlinnak)’ minsen thut lo dingin bia kan khiah ko nain, 2020 ahcun zawtfah zohkhenhnak, rianṭuannak nawl peknak kong le ngakchia sianginn kainak telh in ralzaam pawl hi bawmh kan i zuam ko hna lai, tiah Malaysia Ramdang Vuanci nih a chim.
Ramdang Vuanci Saifuddin Abdullah nih, “Malaysia um zatlang bu pawl nih an tuahmi ca cawnnak ah a kaimi ralzaam ngakchia pawl theihpinak le zulhphung ṭha tuah ding zongin ruahnak kan ngei,” ati.
“UNHCR he ṭha tein rian kan ṭuanṭi i UNHCR cu voi tam ngai ka ton cang hna. Ṭha tein an i fiang i (UN lungtlinnak ah) minsen thut a kan hnek lo.
“A ngaingai ahcun, UN luntlinnak minsen kan thut rih lo i kan cohlang rih lo nain ralzaam caah tam ngai kan tuah cang ti cu ṭha tein cazin a um dih ko – a taktak ahcun, Ralzaam kong Ram Khat le Khat Lungtlinnak minsen a thumi ram cheukhat nakin kan tuahmi a tam deuh,” tiah naite i Bernama media interview ah a chim.
