UNHCR: Canada ummi nih tangka in Malaysia le India ummi laknak kong

Updated on November 16th, 2021

Nizaan tihni ah, Australia ummi nih tangka in Malaysia le India um Chin refugee laknak kong ka ṭial i mi tampi nih nan rel mi ka hmuh. Canada ummi zong nih tangka in Malaysia le India ummi Chin refugee lak khawh asi.

A ngaingai ahcun, Australia nakin tangka a dihmi tlawm deuh. Canada ummi minung 5 i bawmh in lak asi.

Mah kong he pehtlai in UNHCR Malaysia nih April 11 ah thawng a thanhmi cu: “Canada ummi minung 5 i bawm in tangka in refugee laknak a tuahmi pawl nih ‘kan lakmi minung hi refugee asi taktak ko timi tatte ca kan ṭialpiak‘ tiin UNHCR Malaysia nan kan fial lengmang.

“UNHCR nih tatte ca kan ṭial lo ti hi theihter kan in duh hna. Tatte ca a hau lo, nan lakmi minung refugee an si tak/lo cu Canada cozah nih amah tein UNHCR sinah hal dingin January 2020 ahkhan Canada cozah le UNHCR lungtlinnak kan ngei cang.

UNHCR thawngthanh

“Cucaah, nan lakmi minung an UNHCR card silole catlap kha copy ulaw kua ko uh,” ati.

Canada cu refugee ah cohlanmi lawng lak khawh asi. Refugee ah cohlan rih lomi Asylum Seeker le CRC card aa tlaihmi pawl cu auh khawh an si lo.

Malaysia dirhmun in chim ahcun, 2013 Asylum Seeker catlap pawl lak khawh an si lo. Refugee ah cohlan cangmi asi ko nain card thlau ruangah catlap pekmi (catlap aa tlaihmi) pawl cu auh khawh an si.

Canada ummi nih tangka tlawmte in Malaysia le India um Chin refugee lak khawh asi

Canada ummi nih tangka in Malaysia le India ummi nan chungkhat silole hawikom, khuami lak nan duh ahcun minung 5 nan i bawmh hau. Latu a rethei tuk sual lai ti an phan caah cozah nih minung 5 a tinak si. Minung 5 an i bawmh ahcun minung 1 nih tangka tlawmte cio lawng an dih lai i hohmanh an rethei lai lo, ti kha cozah nih a ruah caah si.

Kan lakmi minung hi kum 1 (thla 12) chung kan zohkhenh lai tiin minthut le zohkhenhnak aamahkhan tangka piah a hau. Hi cu Australia in tangka (CSP) in aa lami zong nih an tuah ciomi si.

Canada ummi nih Malaysia silole India ummi minung 1 laknak caah tangka $16,500 (Malaysia tangka thong 55) a dih. Minung 5 i bawmh si caah minung 1 nih $4,000 cio lawng chuah a hau (Canadian dollar asi, US dollar si lo).

Australia in cun minung 1 laknak caah Australian dollar 42,000 (Malaysia tangka ting 1 le thong 28) a dih — mah zat tangka nih cun Canada ahcun minung 2 a lak khawh hna.

Nuva (minung 2) laknak caah cun $24,800 (Malaysia tangka 82,000) lawng a dih. Australia in minung 2 laknak caah cun $46,000 leng (Malaysia ting 1 le thong 40 leng) bak a dih. Phun dangin chim ahcun, Australia in fa ngei lo nuva laknak tangka nih Canada in minung 7 chungkhar pakhat a lak khawh hna.

Canada in laknak caah a dihmi tangka zat cu atang hmanthlak ah ka tarmi hi si, 2021 ta asi.

Canada in Malaysia le India um Chin refugee laknak caah a dihmi tangka zat, 2021 – Source: Canada cozah

Ramdangmi cu Canada in tangka in aa lami an tam ngai. Chinmi balte hi Canada ah ummi kan tlawm tuk caah maw si hnga, aa lami kan um huaha lo.

A dihmi tangka hi zoh tikah, rian niam bik a simi sehzung rian a ṭuanmi minung 5 hmanh nih fawi tein laknak tuah khawh asi.

Canada cozah nih tangka tlawmte in refugee laknak a tuahmi hi refugee bawmtu bu pawl nih an thangṭhat tuk. “Australia cozah nih tangka in refugee laknak (CSP) na tuahmi hi cu a man fak tuk, Canada bantukin man fawi deuh in tuah ve ….” tiah Refugee Council of Australia nih Australia cozah a forhfial ve lengmang.

Nawlpatnak: Thil ṭha cu hrawmh cio phung asi. Mi tampi hmuh dingin SHARE cio usih. Website ngei pawl nih nan website ah i tlen lo dingin kan in nawl hna.

Khrihfabu zong nih lak khawh asi – mah kong cu mah hi hmet law rel khawh asi.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...