Malaysia Chin ralzaam bu 5 komh (ICC – Independent Chin Communities) hruaitu pawl nih UNHCR Malaysia lutlai Thomas an ton i UN card le catlap ngei rih lomi Chin ralzaam pawl card na pe hna lai maw, tiah an hal.
Thomas nih, “Malaysia ram chung hmun kenkip ah UN catlap silole UN card ngei lo ralzaam tampi an ummi kan hngalh. Chin ralzaam lawng si loin miphun thleidan um loin ralzaam paohpaoh nih anmah tein fawi tein UN hmatpungtin (UN catlap siloah card) an sok khawhnak hnga kan i zuam cuahmah lio asi,” tiah a leh hna.
“UN catlap silole UN card a ngei rih lomi ralzaam le himnak kawltu zeizat hrawng dah an um ti zong kan tuak liopi asi. A herhmi zong a tlamtling thlu rih lo.
“Tu kum dongh lai ahcun, UN website https://help.unhcr.org/malaysia ah mithar laknak kong thawng kan thanh khawhte ṭheo lai tiah ruahchannak kan ngei. Tu kum ah a tlamtlin lo hmanh ah hmai kum ahcun a tlamtling ko lai.
“Cutin UN website ah internet in mah tein UN card sok khawh asi te lai.
“Zeitin dah a ran biknak in kan tuah khawh lai ti aphi kan kawl liopi asi.
“Cun atu lio Myanmar ram ah a cangmi thawngpang pawl hi dong loin theih khawh peng kan i zuam. Hmun cheukhat cu thawngpang theih a har tuknak zong an um. Thawngpang hi mi pakhat sin lawngin si loin a kenkip sin in theih khawh kan hau.
“Aruang cu caan tampi peek in minung pakhat tete in thil sining hal peng kan duh ti lo. Cun, UN hmatpungtin (UN card) a soktu pawl cu an case aa khah dih awk a ṭha lo. An tonmi cio te kha an chim a hau. Mah lawngah UN hmatpungtin ngah/lo biakhiahnak a bawmh hna lai,” ati.
October 9 ah ICC (CRC, ACR, FRO, ZAM, Dai) hruaitu pawl nih UNHCR Malaysia hruaitu Thomas an ton lio ah an hal i a lehmi hna si. ICC upa an i manh lo ruangah atu lawng mipi sinah thawng an thanh khawh.
Theihternak: UN nih mithar a lak lai tiin Laitlang um chungkhat auh hrimhrim lo ding. Voi dang bantukin hmun kip ah a tomtom in mithar lak kha asi ti lai lo.
Laknak thawngpang cu UN website ah an thanhte lai i cutin internet in mahte cio in UN card sok (mithar nih sok) asi te lai. Chinmi caah cun ngah a har taktak lai. Vawleipi nih an tuarnak thawngpang theih pimi Rohingya, Kachin, Syria, tbk., pawl ca lawngah ngah a fawi lai.
Kum 2012 ah Malaysia a phan i kum 7 leng a um cangmi Chinmi thong 16 (16,000) hmanh UN nih card le catlap a chuh cang hna. Atu hi UN catlap hmanh ngei loin an um. Mah pawl hmanh hi atutiang ah card pek a tim rih hna lo.
Malaysia UNHCR nih tlaihkhih kongah a chimmi – hmet law rel khawh si
UNHCR catlap kha card in thlenpiak dingin kan i zuam, MyRC card sok hlah uh
UNHCR nih 2013 card chuhmi Chin ralzaam 16,000 kong a chimmi
