US ram, Oklahoma khuapi um kum 16 Myanmar nu Su Hliang cu ni 2 chung a tlau hnu ah a ruak in an hmuh. Ningani chun ah Lake Overholser tidil chungah a ruak cu an hmuh.
Oklahoma City palek sakhan nih, “tidil chungah kan hmuhmi ruak cu a tlaumi Su Hliang (kum 16) ruak asi,” tiah thawng a thanh.
Su Hliang cu a chungkhar nih ‘a tlau’ tiin Nithumni ah palek sinah thawng an thanhmi asi.
A ruak cu Oklahoma state ruak checknak zung nih a check lio asi. A check dih hnu ah a thihnak aruang cu an fehter te lai.
Su Hliang cu Nihnihni zaan ahkhan a sianginn kainak Northwest High School ah a donghnak bik an hmuh.
A chungkhar nih, “a tlau hlan ahhin a lungrawk tukmi muisam a keng,” tiah an chim.
A tlau hlan ah ca a rak ṭial tami zong an hmuh. “Kan chungkhar in vanram tu ah kan i tong ṭhan te hna lai” tiah a ṭial ta.
A chungkhar hi Mirang holh an thiam lo caah chungkhat pakhat nih holh a lehpiak hna.
Holhlehpiak tu nih, “Su Hliang hi mi daite asi, hawikom zong tam a ngei lo. Lungrawhnak fakpi ngeih dawh asi. Amah in tein aa in.
“Lungrawhnak fak tuk a ngeih ruangah hi vawlei cung nun hi a zuam ti lomi alo. Kan chungkhar in vanram tu ah kan i tong ṭhan te hna lai tiin ca a ṭial ta,” tiah a chim.
