Kan hnu thla i Afghanistan khualipi Kabul um US ralkap pawl US kir an i timh lio ahkhan US ralkap nih drone in Afghanistan mipi 10 an kah thah hna. Ngakchia 7 an i tel.
“Ralram ah hruaitu ka si bang, mah kahnak kha keimah hruaimi asi, tuksapur in kai palh,” tiah U.S. Marine Corps bawi Gen. Kenneth McKenzie nih lungrawk tukin a palhnak aa vuankhan.
US ralkap pawl an umnak Kabul airport ah ISIS ralhrang nih US ralkap thahnawnnak tuah an timh, tiin US sungṭhoh pawl nih an zumh caah an kah cu ISIS si loin sualnak ngei lo Afghanistan mipi an rak si.
“Mah kan kahmi kha cu kan palh tuk hringhran, tuksapur in kan palh,” tiah kahnak nawl petu ralbawi McKenzie nih thawngla pawl sinah a chim.
US Runvennak/Ralkap Vuanci Lloyd Austin nih thah a tongmi hna chungkhar cu cathanh in ngaihthiam a hal hna.
“Kha lio ah a thimi hna nih tantakmi chungkhar dihlak nan ngaihchiatnak kan hrawmpi hna.
“Ngaihthiam kan in hal hna, atu tuksapur kan palhnak hi hmailei ah lungfimnak caah kan hman lai,” ati.
Ralbawi McKenzie nih, “Tantakmi chungkhar hna cu US cozah nih tangka bawmhnak pek dingin khua a khan cuahmah lio asi,” tiah a chim.
“August 29 ahkhan US ralkap pawl nih Toyota mawṭaw a raangmi pakhat an hmuh. Mah mawṭaw cu ISIS ralhrang nih US ralkap umnak Kabul airport ah thahnawnnak tuah an timh tiin an zumhnak hmun in aa thawhmi asi. Suimilaam 8 chung an ngiat.
“Mah mawṭaw cu ISIS ralhrang nih an hmanmi si tiin US sungṭhoh pawl nih an zumh.
“Ralhrang umnak hmun in ai thawhmi si caah kan mongtu ngei lo vanlawng (drone) in bomb in kan kahnak asi.
“Mah kong ahhin cun kan sungṭhoh pawl an i palh cikcek.
“Drone in kan kah tikah, minung 10 an thi. Ngakchia 7 an i tel. Hohmanh ISIS he aa pehtlaimi an si lo,” ati.
August 26 ah, nunpek bomb puahtu ISIS ralhrang nih Kabul airport ah US ralkap 13 a thah hna. Midang zong tampi an thi. Mah ruangah atu bantukin US ralkap nih ISIS an kawlnak ah an i palh sual hi si.
US ralbawi McKenzie nih, “Mah lio ahhin ISIS an si kho men tiin kan lunghrinhmi 60 hrawng an um.
“Toyota mawṭaw cu ISIS ralhrang nih bomb an phorhnak tiin kan ruah.
“Kan kah lio ahhin a pawngah mipi hohmanh kan hmu hna lo,” ati.
An kah thahmi lak ahcun, US Aid group ah rianṭuanmi Ezmarai Ahmadi zong ai tel ve.
Ahmadi a upa Aimal nih, “Toyota mawṭaw ahcun kan inn ummi ngakchia vialte an i cit dih. Rocket nih mawṭaw cu a khen.
“An dihlak in an thi dih.
“Ka naupa le a fale 4 an thi. Ka fanu hniang a thi ve. Ka tule zong an thi dih,” tiah lungfak taktak in AFP sinah a chim.
Muslim ralhrang nih kum 2001 September 11 ah US um World Trade Center zungpi ciam dihlak in vanlawng in an pah i minung 2,996 an thah hna.
Mah ruangah US nih ralhrang cihmih dingin Afghanistan le Pakistan ah US ralkap a thlah hna i kum 20 chung a doh hna chungah Afghanistan le Pakistan rammi 71,000 leng an thi.
