Tuni ah US Ralkap Vuanci Pu Lloyd Austin nih, “Ukraine ramri lei ah Russia ralkap tam chinchin an kal,” tiah a chim.
“Russia President Vladimir Putin nih Ukraine ramri um kan ralkap tlawmpal cu sakhan lei ah an kir cang ati nain an kirmi kan hmu lo,” ati.
US Ralkap Vuanci cu Ukraine innpa a simi Poland ram ah a tlawng i tuni ah Poland Ralkap Vuanci Pu Mariusz Blaszczak he media sin thawngthanhnak an tuah.
“Ukraine ramri um Russia ralkap an kirmi hrim kan hmu lo. A taktak chim ko ahcun, Russia President Putin nih Ukraine ramri lei ah ralkap tam chinchin a thlah hna. Hriamnam le ralkap thilri zong tam chinchin a kuat.
“Mah vialte zoh tikah, Russia President Putin hi Ukraine tuk dingin aa tim peng rih ko ti khawh asi,” tiah US Ralkap Vuanci nih a chimchap.
Russia President Putin nih, “Ukraine ramri ah ral tuk a cawngmi kan ralkap le tank pawl cu an umnak ralkap sakhan lei ah an kir cang…,” tiin thawng a thanh hnu ah atu bantukin US Ralkap Vuanci nih media sinah a chim hi si.
Atu hi Russia ralkap ting le cheu (150,000) leng nih missile, helicopter, tank, tbk in Ukraine ram cu an kulh dih cang.
President Putin nih Ukraine tuk dingin kuat a zaih (lam a kawl) cuahmah lio asi tiin US le nitlaklei ram hruaitu pawl nih an zumh.
Cucaah tu zaanlei (Asia caan cun thaizing zingka) ah US President Joe Biden le nitlaklei ram hruaitu pawl cu Ukraine runvennak kong meeting an tuah lai.
US Ralkap Vuanci nih, “US ralkap tank (Abrams tank) 250 cu Poland sinah kan zuar lai. Zei tik dah Poland ram ah kan kuat lai timi cu kan ceih hmasa rih lai,” ati.
Ukraine cu ramri in Russia ralkap a ting leng nih an kulh dih caah Ukraine innpa a simi Poland zong a lungrethei tuk. Russia nih Ukraine a tuk ahcun Ukraine rammi a ting le nuai tiangin Poland ah an zaam lai i Poland sipuaizi zong a tla dih ve lai.
US nih US ralkap 4,700 hrawng cu Poland ram ah a kuat cuahmah hna lio asi. Mah he cun Poland um US ralkap dihlak hi 10,000 hrawng an si lai.
Poland cu NATO chungtel asi. Ukraine cu NATO chungtel asi lo caah US nih Ukraine ah dengteo in a ralkap a kua ngam lo, Russia thin ka phawh lai i buainak a fak chin lai ti a phang, cucaah Ukraine innpa Poland tu ah a kuat hna hi si.
