A ra laimi 2020 Myanmar ram thimnak ah USDP party nih teinak a hmuhnak hnga Myanmar president hlun U Thein Sein nih a tel pi ve hna lai.
“USDP campaign tuah tikah Myanmar president hlun U Thein Sein telhin party rak dirhka in hruaitu hlun a simi pawl nih a kan bawmh lai, tiah USDP party biachimtu Dr Nandar Hlah Myint nih a chim.
Myanmar president hlun U Thein Sein telhin party hruaitu hlun pawl cu rian nganpi pek an si lo nain party member an si rih ruangah thimnak a neih cang bang USDP party nih teinak a hmuhnak hnga an i tel ve hi a si.
“An kumkhua le an tlunkal khawh ning hoih in party campaign cu tuah a si lai.
“USDP party nih tu kum thimnak ah aa zuam dingmi MP pawl cu a thim cang hna i fehter lawng a tang cang,” tiah Dr Nandar Hlah Myint nih a chim.
U Thein Sein cu USDP party ah chairman rian in aa thok i 2010 thimnak ah USDP party nih teinak a hmuh caah president a hung si.
Mah hnu ah Thurah Swe Man cu USDP party chairman rian an pek nain 2015 ah chairman in aa phuah caah atu lio chairman U Than Htay nih a rian a chawn.
2020 Myanmar ram thimnak cu tu kum November 8 ah tuah an timh. – RFA
