Myanmar Vice President Pu Henry Van Thio nih “October tiang cu punghman in ramdang khualtlawn kan ong rih men lai lo,” tiah a chim.
Nihnihni ah Khualtlawng Ṭhanchonak Committee meṭing an tuah lio ah a chim hi si. “Airports pawl zong September thla dih hnu lawngah ramdang kal vanlawng luhchuahter dingin timhtuah an si,” ati.
Myanmar cozah nih “ramdang khualtlawn kan on tik ahcun ASEAN le Asia ram kip cozah zong thawng kan thanhte hna lai” tiah a rak chim bal cang.
“Thailand le Vietnam telh in Covid-19 a kham khomi ram pawl le Myanmar i tlawn on chung ding kong zong kan ruat” a rak ti.
VP Henry Van Thio nih, “China, Japan, Korea, Hong Kong le Macao cu Covid-19 an kham khawh ngai caah Myanmar he i tlawn on cang dingin khua kan khan lio asi,” tiah a chim.
March 31 thokin atutiang Myanmar cozah nih ramdang khualtlawn a phih peng. Naite ah July 31 tiang a sauh. July 31 pinlei tiang a sauh rih lai maw ti chim khawh asi lo nain Vice President bia chimmi ruah tikah sauh rih dawh asi.
Nain, ramdang ah aa tapmi Myanmar rammi pawl, thil phor vanlawng le ramchung vanlawng pawl cu zuan a onh cang hna.
Thil sining a hngalmi pawl nih, cozah nih ramdang khualtlawn a phihmi a sauh ahcun ram sipuaizi a hnorsuan tuk lai an ti.
“Cozah nih a phihmi hi October tiang a sauh ahcun, airport tlaitu pawl le khualtlawnnak sipuaizi a tuahmi vialte i hrim ṭhan kho ti loin an sipuaizi a tla dih lai,” tiah Myanmar Airways International General Manager U Tin Maung Than nih a chim.
“Kan ram lawng nih phih a ngah fawn lo. Vanlawng company pawl nih ramdang thil sining hoih in rian an ṭuan hau, vice president nih a chimmi hi a tlai deuh tiin ka ruah,” ati. — Irrawaddy
