Yangon ah minung 1,000 hrawng nih ralkap duhlonak an langhter

Tuni ah, Yangon khuapi Insein zalampi ah minung 1,000 hrawng nih ralkap duhlonak an langhter.

February 1 ah ralkap nih NLD uknak a chuh hnu in nihin tiang Myanmar ram ah ralkap duhlonak an langhtermi vialte lakah a nganbik si.

“Ralkap uknak rawk seh!”, “Ralkap uknak kan duh lo!” tiin Insein zalampi ah an au.

Pawngkam mipi nih rawl le ti an pek hna.

Aung San Suu Kyi party NLD thantar color a senmi an thui pah thluahmah lio, Insein zalampi ah palek nih an kham hna.

Ralkap a lau tuk i hohmanh thawng i thanh kho hna hlah seh tiah a rannak in internet a phih colh. Facebook, Instagram le Twitter vialte a phih dih.

Norway company Telenor nih, “Myanmar ralkap nih thawng kan in thanh ṭhan hna hlan tiang Faccebook, Instagram le Twitter phit dih uh a kan ti caah kan phih,” tiin a thanh.

Cucaah, mi tampi cu an umnak ram thlen dingin Virtual Private Network (VPN) an download i cutin Facebook, Twitter le Instagram cu an hman.

Kawlram ummi nih Facebook, Instagram le Twitter nan hman khawh lo ahcun Hotspot Shield VPN hi download uh. iPhone caah mah hi hmet, Android caah mah hi hmet.