China nih Myanmar cu Covid-19 kakuaisi (vaccine) free in a pek lai, tiah China Ramdang Vuanci nih Nihnihni ah thawng a thanh.
Naite ahkhan China Ramdang Vuanci Pu Wang Yi cu Myanmar ram ah ni 2 a va tlawng i kakuaisi free in kan in pek hna lai tiah Myanmar cozah bia a tiam.
“Nan herh zat in Covid-19 kakuaisi kan in pek hna lai. Cun, kakuaisi kong ah i bawm in rian ttuan tti dingin bia kan i ruah te hna lai,” tiah Pu Wang Yi nih Myanmar cozah sinah a chim.
Pu Wang Yi cu Myanmar ralkap bawizik Min Aung Hlaing he zong tonbiaruahnak an ngei i China le Myanmar chawlehnak a tthancho nak hnga ralkap nih kan bawm ve uh tiah Pu Wang Yi nih a ti.
Pu Wang Yi cu January 16 ahkhin China ah kir tthan ding si i Myanmar ram a tlawn dih hnu ah, Indonesia, Brunei le Philippines zong ah tlawm pah aa tim.
Cun, Myanmar ram a tlawn lio ah State Councillor Pi Aung San Suu Kyi he zong tonbiaruahnak an ngei i chawlehnak le Covid-19 kakuaisi kong an i ceih.
Pi Suu nih,”Covid-19 kakuaisi na kan bawmh caah kan i lawm. Myanmar ram thilchuak pawl zong China ah tam deuh kan zuar khawh lai ti kan i ruahchan.
“Cun, kan rammi zong nan ram ah tamdeuhpi rian an ttuan kho lai ti kan i ruahchan. Myanmar nih China le Asean pehtlaihnak tthatter kan i zuam ve lai,” tiah a chim.
