House Speaker Nancy Pelosi le Democrats pawl nih President Donald Trump impeachment tuahnak ah a telmi Republican palai 10 cu ningzak taktak nan si. Kan ram caah President Donald Trump nih thil tha tampi a tuah hnu ah rianrang tuk in hnulei nan chit than i nan leirawl cu ningzak taktak nan si, Kan chan chungah amah bantuk kan ram caah thil tha a tuahmi President hi kan ngei bal rih hna lo.
President Trump nih ngunkhuai tax tlawm deuh a kan laak, rian ngei an tam i, rian ngei lomi an zor, kan ram sipuaizi a thawnter. NATO chungtel hna nih an thawh dingmi thawhvo an hngalhter than hnai an thawhvo an thawh than. North Korea cu raltha tein a reng hna i, an hruaitu tiang amah pumpak in a va ton hna. Tuluk cozah nih US an duh paoh in cilnaal khawh lo ding in a kham. President Trump nih a luan cia thla tawmpal lio ah Middle East ram a simi, Israel, UAE le Bahrain karlak ah daihnak a ser khawhmi hmanh hi Nobel Peace Prize pek phu tuk a si.
President Trump nih biaknak a kilven ning hi aho President hmanh nih an rak tuah bal rih lomi a si. Prison reform timi thongthlak ning le thongthla mi hna caah thlennak tampi a ser i, kan ram thlanglei Mexico ramri zong him tein a tuah khawh. Muslim ralhrang ISIS pawl le a pial sualmi mulsim hruaitu pawl zong a tei dih hna.
President Donald Trump bantuk minung nunnak a sunhsakmi [ Pro Life] President kan ngei bal rih lo, Asinain House Democrats nih cun impeachment an tuah thiamthaim, aruang cu, an huat tuk caah a si, amah pumpak sining vialte cu an si khawh chung in hrawhhral dih an duh caah a si. Amah party minung 10 lila zong nih amah leirawi dingah democrats party sin ah an va kawp. President leirawi dingah ngun tangka sawm 30 ngah dingah speaker Nancy Pelosi nih bia rak kamh hna sehlaw a dawh.
President Donald Trump cu minung a si caah a tamtlin lonak a tampi lai. A luan ciami caan chungah President Donald Trump nih a chimmi le a tuahmi cheukhat cu ka lungtlin lomi le ka dirkamh lomi thil tampi a um ve ko. Januarty 6 kha President Donald Trump a limhang a niam bik caan a si. 2016 President a cuh lio tein a tlamtlin lonak le a chambaunak tampi kan rak hngalh cang ko. Asinain keimah le minung million nih vote kan rak pek, a ruang cu, amah nih a dirpi mi policy le bia a kan kamhmi ruangah a si. Atu tiang zong mah policy vialte cu ka dirpi pengmi si ko.
Democrats nih hin President rian a thawk le cangka in a sual an kawl i, thlak an timh zungzal. Nizan tih ni i an thil tuahmi nih kan rampi cu thenhmalnak tu a chuahpi chinchin. President thim tharmi Joe Biden nih a biakam ning bantuk in rammi hna lungrual tein kan umti khawhnak ding tu hi ka ruahchan mi cu a si.
Caṭialtu: Salai Lairamthang
