US palek nih hriamnam aa ken lomi minak pa an thah ruangah US rampumpi le ramdang tiangah “Minak Nunnak a Biapi (Black Lives Matter)” tiin sandah an piahmi cu Noble Peace Prize laksawng pe hna uh tiin an hal piak, min an pek (nominate).
Black Lives Matter cawlcanghnak cu kum 2013 ah US ramah dirhmi bu asi. Ni kum May thla ah Mirang palek pa nih minak pa George a tlaih lio ah vawlei ah a khuk in a hngawng a rial/nenh. George nih “ka thaw ka chuah kho lo” a ti len nain zei relpiak loin minutes 8 chung a nenh caah a thi.
Mah ruangah US rampumpi le ramdang tiangah “Black Lives Matter (BLM)” tiin sandah an piah.
“Mah cawlcanghnak hi miphun tlukruannak caah vawleipumpi huap in a nganbikmi le a ṭhawng bikmi cawlcanghnak asi,” tiin Nobel Peace Prize a halpiak tu Norway Socialist Party MP Petter Eide nih AFP media ah a chim.
“BLM cawlcanghnak cu ramdang tampi tiangah a karh i … miphun thleidan doh a biapit tuk ning kha mi tampi a theihter hna,” ati.
Ramkip rampumpi hlutdaw MP (Pyidaungsu Hluttaw MP, Pi Ni Sui Lian, tbk.), Ramkip rampumpi vuanci (Myanmar Ramdang Vuanci, Ramchung Vuanci, tbk.), Ramkip cozah lutlai pawl (VP Henry Van Thio, tbk.), Nobel laksawng a ngah balmi (Suu Kyi bantuk pawl) nih “amah hi Nobel laksawng pek awk ah a tlak” tiin halpiak/min pek (nominate) khawh cio asi.
Tuni, January 31 tiang lawng halpiak/min pek khawh asi. Kum fatin September in January kar hi Nobel laksawng caah min pek caan asi.
Nobel laksawng caah min pekmi (halpiakmi) pawl cu Nobel Committee nih an zohfel hnu ah October thla thokka ah vote an thlak i tambik a ngahmi nih a co. A cotu (winner) cu October thla ah an thanh colh. Laksawng peknak puai cu December thla ah an tuah.
Nobel lawksawng phun 6 a um;
- Nobel Peace Prize
- Nobel Prize in Physics
- Nobel Prize in Chemistry
- Nobel Prize in Medicine
- Nobel Prize in Litrature le
- Nobel Prize in Economic Sciences hna an si.
1nk hi cu Norway khualipi Oslo ah thimnak le laksawng peknak an tuah. Adang 5 hi cu Sweden khualipi Stockholm ah an tuah.
US President hlun Donald Trump le US ralkap biathli le Hillary Clinton biathli phuangtu Wikileaks dirhtu Julian Assange zong min pekmi lakah an i tel ve, an halpiak ve hna.
2020 Nobel Peace Prize cu World Food Program nih a ngah. WFP cu UN nih a dirhmi, vawlei cung ramkip ah hartong pawl tirawl a petu bu asi. Chin state, Paletwa peng zongah Chin ralzaam pawl rawl a rak pek hna.
Trump le BLM ahhin ho nih dah Nobel Peace Prize a ngah awk si tiin na ruah? Zei ruangah? Na ruahning comment ve.
