US nih, “Myanmar ralkap nih uknak na chuh (a-na-ting) mi hi na pek ṭhan lo ahcun US nih hma kan lak lai,” tiin a tlerh.
Tu zingka dei hlan ah Myanmar ralkap nih NLD acozah uknak a chuh i “kum 1 chung ralkap nih ram kan uk lai” tiin a thanh caah US nih a tlerh hi si.
US President Zung (White House) biachimtu Pi Jen Psaki nih, “Burma ram democracy asi ding hi kan duh pengmi asi, cucaah ralkap nih democracy phungphai le upadi zul in tuni na tlaihmi cozah rianṭuan vialte thlah dih hna, tiah US le kan ṭanṭi Asia ram pawl nih kan in fial,” tiin cathanh a chuah.
“Ralkap nih naite Myanmar thimnak phichuak thlen nai zuammi le Myanmar democracy lamthluan na dawnhmi hi US nih kan cohlang lo. Hihi nai ngol lo ahcun na cungah hma kan lak lai.
“Thil sining naih tein kan zoh. Myanmar mipi kan in dirkamh hna,” ati.
Myanmar ralkap nih NLD acozah uknak a chuhmi kong cu US Ram Himnak ruahnak petu Jake Sullivan nih President Joe Biden a chimh cang, tiah theih asi.
US Ramdang Vuanci Pu Antony Blinken zong nih, “ralkap nih uknak a chuhmi hi tuksapur taktak asi,” tiah a chim ve.
“Cozah rianṭuan le zatlang bu rianṭuan na tlaihmi vialte hi thlah dih hna. November 8 thimnak ah Myanmar mipi nih an duhmi an langhtermi hi upat piak hna,” ati.
Australia Ramdang Vuanci Pi Marise Payne nih, “phungninglo in na tlaihmi cozah rianṭuan le zatlang bu rianṭuan vialte a rannak in thlah dih hna,” tiin Myanmar ralkap cu a au hnawh ve.
Daw Aung Sang Suu Kyi, President U Win Myint le Vice President Pu Henry Van Thio cu tu zingka dei hlan ah ralkap nih an tlaih hna i Vice President U Myint Swe (ralkap) kha caankarlak president a ṭuanter – mah kong cu mah hi hmet law rel khawh si.
Mah cangka in caankarlak president U Myint Swe nih nawlngeihnak vialte cu ralkap bawizik Min Aung Hlaing sinah a pek dih.
Atu hi Yangon le Naypyitaw khua chungah ralkap an khat dih. Phone le Internet line zong ralkap nih an phih dih.
Bank ah tangka chuah zong a ngah lo. ATM seh pawl an khar ter dih hna.
