Australia Chin khrihfabu tampi i funtomnak Chin Christian Council in Australia (CCCA) nih Kawlram ralkap duhlo langhternak (CDM) caah tangka $93,000 (Kawlram ting thong 1) an kuat.
“Hihi rianrang in kan bawmhmi hna asi. Caan saupi tiang bawmh dingin timhtuahnak kan ngei,” tiah CCCA nih a thanh.
“CCCA member a silomi Chin khrihfabu dang nih an hlutmi zong kuatpiak colh an si lai.
“Nan tha chuahchin ko u, atu hi Kawlram dothlennak caan ṭhabik asi,” ati.
CCCA mino nih ralkap duhlonak cathanh zong atanglei bangin Laica, Mirangca le Kawlca in an chuah.
“Kawl ralkap nih Kawlram uknak hramhram in an chuhmi hi kan doh.
“Vawleicung miphun dang le hawikom vialte nih Kawl ralkap uknak hi kan thlakpiak ulaw, kawlram ah zauk phung in kan i uk ṭhan khawhnak hnga kan bawm u.
“CCCA mino vialte nih atu lio Civil Disobedience Movement cu kan dirkamh i thazaang, fimnak le chawva chuah in kan i tel”.
CCCA cu Australia um Chin khrihfabu vialte i funtomnak caah October 9, 2011 ah dirhmi asi. CCCA ah a lut rih lomi Chin khrihfabu zong an um pah rih.
