Myanmar ram ah ralkap nih uknak a fir hnu February thla dongh thokin India lei ah a zaammi minung 400 leng an si cang, tiah India palek nih March 15 ah thawng a thanh.
A rak zaammi hna lakah palek an tambik tiah Reuters nih a ttial.
Kan hnu zarh Ningani te lawng ah minung 116 cu India ram, Mizoram state lei in an rak lut an ti.
“A rak zaammi lakah meithat zung rianttuan zong an i tel. Cheukhat cu plastic tom 1 in an thil an rak i ken, cheukhat cu zeihmanh ken loin an rak zaam,” tiah India palek bawi pakhat nih a chim.
Ralkap nih sandahpiahmi mipi pawl cu meithal in kah a kan fial i kan tuah duh lo caah kan zaammi a si, tiah a zaami palek pawl nih an chim.
Myanmar ram ah ralkap nih uknak a fir hnu in cozah rianttuan tampi cu ralkap uknak doh can ah CDM an lut hna. Cucaah, ralkap nih tlaih a timh hna i a zaami zong an um len.
India cozah nih “a hung zaammi Myanmar rammi ka bawmh hna lai” a ti cang.
Myanmar ram nichuahlei um Thailand zong nih “a hung zammi Myanmar ralzaam pawl ka ka zohkhenh hna lai” tiin ramri khua tampi ah ‘ralzaam umnak (refugee camp)‘ tampi a timhtuah cang.
