US ram, Minneapolis khuapi ah minak pa George Floyd thattu palek pa Derek Chauvin cu ‘lainawng asi’ tiin biaceihzung nih nizaan ah a khiah cang.
“A thah hramhrammi cu si lo nain, a hngawng nenh caah a thi, a thah sual, cucaah lainawng asi” tiin biaceihzung nih a khiah hi si.
George Floyd cu ni kum May 25 ah a hnulei ah kut an leh buin vawlei ah a buktakhup in an thluk i palek pa Derek Chauvin nih a khuk in minute 9 le cheu chung a hngawng nenh caah a thaw chuah kho lo i a thi.
George Floyd nih $20 ca deu in thil a cawk caah palek an chawnhmi hna si.
Dawr hngaktu pa nih, “Palek chawnh loin, a tangka tu kha rak khirh ning law a thi hnga lo,” tiah palek a chawnh aa ngaichihnak kong a chim.
Minnesota state cozah sihni bawizik Keith Ellison nih palek pa cu taza a cuai i ‘a thah hrammi cu si lo nain, a thah sual ko, lainawng asi’ tiin bia an khiah khawh hi si.
Hmasa ahcun palek nih “George Floyd a thihnak aruang cu a ngandam lonak ruangah si” an rak ti.
Biaceihtu Mirang 6, minak 2 le miphun dang 2 nih “palek pa nih a thahmi si ko” tiin bia an khiah hi si.
Mah kong he pehtlai in President Joe Biden nih, “Ka lunghno dih, bia an khiahmi hi a dikmi si hraam seh ti hi ka thlacamnak si,” tiah a chim.
Tazacuaitu sihni nih, “Palek pa nih a khuk in hngawng nenh kha a herh lomi si” ati. Palek pa sihni Eric Nelson nih, “Khua a ruat khomi palek nih cun Derek Chauvin dirhmun hi an theihthiam ko lai” tiah a al nain a sung.
Palek kut in Floyd a thihmi cu “Mirang nih minak nan kan nek rengreng, Minak Nunnak A Biapi” tiin US rampumpi ah minung ting tampi nih duhlonak an rak langhter.
US um Chin mino tampi zong an rak i tel ve caah palek pa a palh lo tiin a ruatmi Facebook hmang Laimi cheukhat nih an rak soisel ngai hna.
US um Chinmi hruaitu le khrihfabu hruaitu Chin pastor tampi zong mah kong ah “palek a palh” a timi le “a palh lo” a timi tiin an ruahnak aa dang cio.
April 11 zongah, minak pa Daunte Wright, kum 21 cu ‘license a thi cangmi mawtaw aa mongh’ tiin palek nih tlaih an timh nain a duh lo caah palek Mirang nu Kimberly Ann Potter nih a kah thah. Daunte Wright cu Floyd a nungaknu high school a rak kai lio ah ca a chimtu si.
