A ra laimi Zarhteni hi Indonesia khualipi Jakarta ah ASEAN ram 10 nih Myanmar buainak kong lakhruak meeting an tuah lai.
Sinain, ASEAN chungtel a simi Philippines President Rodrigo Duterte le Thailand Prime Minister cu ‘meeting kan kai lai lo’ an ti. Nain, zei dang ruang si loin an ram COVID-19 pulrai ruangah asi.
Philippines Ramdang Vuanci Zung nih, “Kan ram COVIDD-19 pulrai luhlinh in tlangtlak a hauh caah kan president cu ramleng chuah awk a ṭha lo,” tiah a thanh.
“ASEAN hruaitu tling tein an kai lo hmanh ah, mah meeting tuah an timhmi hi Philippines nih biatak tein tha kan pek hna.
“President Duterte zaka ah Ramdang Vuanci Teodoro Locsin a kai lai, amah nih Philippines president aiawh in meeting ah bia a chim lai,” ati.
Thailand Prime Minister Prayuth Chan-ocha zong nih ‘ka kai lai lo’ a ti.
“Myanmar buainak kongah ka lungṭha hrimhrim lo, an ram lawng si loin innpa ASEAN ram vialte a hnorsuan lai. Nain, kan ram ah COVID-19 pulrai a karh tuk caah meeting ka kai thiam lai lo,” ati.
“Keimah aiawh in Rampumpi Vuancichoh Changtu le Ramdang Vuanci Don Pramudwinai a kai lai,” ati.
