India ram ah COVID-19 zawtnak a karh tuk lio si bang, New Delhi khuapi um Chin ralzaam pawl zong tamtuk an zaw ve.
Chin ralzaam 100 leng COVID-19 zawtnak an ngei cang, a ngei lomi pawl zong cozah nih lengchuah a khap ruangah rian an ṭuan kho lo i harsa ngai in an um hna, tiah Chin Refugee Committee (CRC) nih a chim.
Chin community hruaitu a si vemi Salai Cung Dawt nih, “Sizung ah mizaw an tam tuk caah April 6 hnu cunn COVID-19 mizaw pawl thlop dingin sizung kalpi an har tuk cang. COVID-19 in a zawmi Chin ralzaam 95% cu inn ah anmah tein an i thlop,” tiah a chim.
Naite ah kum 30 a simi Chin ralzaam Samuel Sang Hlung Thang cu Delhi um sizung pakhat ah COVID-19 zawtnak in a thi. A nupi le fale 2 a liamtak hna. Mah hi hmet law rel khawh asi.
Tuni zongah Chinmi nih bochanmi Dr. Kipgen nih COVID-19 in a kan liamtak rih. Mah hi hmet law rel khawh si.
“Chin ralzaam 98% cu ṭuan chom ei chom an si hna. Cozah nih lockdown a tuahmi hi zarh 1 lawng si ko nain, mi tampi cu inn hlan man pek awk le rawl cawknak tangka an chanbau cang.
“Chin ralzaam pawl harnak kong cu CRC nih UNHCR sinah thawng a thanh i rianrang in bawmhnak a hal.
“UNHCR nih tirawl cu bawmh a timh ko hna nain lockdown ruangah zei pipa a bawm kho hna lo.
“COVID-19 raikhamsi chunh dingin cozah nih thawng a thanh nain, India hmatpungṭin (ID) piah a hauh caah Chin ralzaam pawl cu kan i chun kho lo. UNHCR card lawng kan ngei. Chin ralzaam cu pakhat hmanh COVID-19 raikhamsi an i chun lo tiin ka ruah ko,” tiah Salai Cung Dawt nih a chimchap.
Atu lio hi, Delhi ah Chin ralzaam 3,000 hrawng ram thumnak kal kho loin an i tap.
Liamcia zarh tlawmpal chungah, Chin state um minung tampi zong Myanmar ramkhel buainak ruangah India ah an zaam hna. — Chinland Guardian
